Ewro roja qirkerdişê Helepçeyî ya. Rejîmê BAASî yo ke Seddam Huseynî serekîya ey kerda, bi amancê qirkerdişê Kurdan serra 1988î de bi operayonêke bi nameyê Enfalî da destpêkerdene û zereyê hîrê rojan de bi hezaran Kurdî qetil kerdî. Qirkerdişê Heleçeyî verê çimanê heme dinya ame kerdene. 16ê Adare seba heme kurdan rojêka sîya ya.  

Amancê operasyonê Enfalî, Irakî ra pakkkerdişê kurdan bî. O taw bi waştişê Seddam Huseynî warezayê ci Alî Hassan Majît o ke leqabê ci Kîmyalsal Alî yo Konseyê Komîteyê Şorişî yê Irakî de bî selahîyetdar. Esasê ci de rejîmê Seddamî 1983 de dest bi nê polîtîyayî kerdîbî.  Goreyê humara Rêxistina Weşîyîye ya Dinyayî (WHO) teyna hêrişê Helepçeyî de 5 hezarî merdimî ameyî qetilkerdene û 7 hezarî ra zêde zî birîndar bîyî. Heta roja ewro zî tesîrê sîlehê kîmyewî dewam kenê ke yeno texmînkerdene ke heta roja ma ya ewroyî dorê 43 hezarî û 753 merdimî cuya xo bedilnaye û 61 hezarî ra zêde merdimî zî seqet mendê. 

Tarîxê kurdan de tim qirkerdişî, surgunî est ê. Labelê vera nê qetlîam, qirkerdiş, şer û polîtîkayan surgunan, kurdan tim dest kerdo xo û têkoşînê xo dewam kerd. Ewro ke kurdî est ê û wayîrê heqanê, no netîceyê nê têkoşînan o. Şarê kurdî qetlîamê sey Qoçgîrî, Dêrsim, Zîlan ûsn. dîyê labelê ne kurdan têkoşînê xo ra fek raverdo û ne zî dewletanê vera kurdan nê polîtîkayanê xo ra netîceyêko baş girewto.

Ewro şarê kurdî, Tirkîya, Irak, Surîye û îran de zaf eşkera eskerî û sîyaset de heqê muhîmê kerdê ra xo dest. Çîyo tewr mûhîm têkoşînê kurdan ê vera DAÎŞî hetê heme dinya ra ame dîyayene û heme dinya rêz û eleqeyo gird mojna têkşînê kurdan. Ewro şervanê û têkoşînê kurdan heme dinaya de yenê naskerdene û verê seba şarê Rojleto Mîyanênî û heme dinya bîyê garantîye demokrasî û aştîye.  Ewro destê kurdan, polîtîkaya kurdan zixm a, sey verî kes nêeşkeno vera kurdan qirkerdiş bîkero. 

Şarê kurdî, qirkerdişî Qoçkigirî, Dêrsimî, Zîlanî, Helepçeyî û qirkerdişê vera êzîdîyan xo vîr ra nêkerdo û do nêkero. Kurdan tim nê rojê sîyayî ardî ra xo vîrî û goreyê ci tarîx û kulturê xo ra wayîr vejîyayî, mîrasê vîzêrî ewro bî bingeyê polîtîkayanê hîna başan. No zî bî sebebê serkewtişanê pîrozan.