Xeylêk şaristananê Rojhelatê Kurdîstanî û Îran de çalakîyê şermezarkerdişî dewam kenê. Bi taybetî şaristananê kurdan de çalakîyî pîl benê. Goreyê Rêxistina Efû şanê çarşemeyî ra nata 8 kesî ameyê qetilkerdene.
16ê êlule qetilkerdişê Jîna Emînî ra nata şarê Rojhelatê Kurdîstanî û Îranî payan ser de yê. Bi taybetî 26ê teşrîna verêne de roja 40. ya qetilkerdişê Jîna de Rojhelatê Kurdîstanî de nawnayîşî resayî astêka newîye.
Rixmê gef û hêrişanê hêzanê dewlete zî bi hezaran kesî vejîyayî meydanan. 27ê teşrîna verêne de şaristananê Mahabad, Bokan, Pîranşar, Serdeşt, Bane, Seqiz, Dîwander, Dêwlan, Kamyaran, Sine, Kirmaşan û Îlamî yê Rojhelatê Kurdîstanî de û şaristananê bînan de çalakîyî ameyî kerdene.
Mahabad de hêzanê dewlete şar da guleyan ver. Xeylêk dezgeh û bankayê dewlete hetê şarî ra ameyî vêşnayene. Bînaya qeymeqamîye zî kewte binê kontrolê çalakîkeran. Ame parekerdene ke hêrişanê dewleta Îranî de xeylêk çalakîkerî ameyî qetilkerdene û birîndar bîyî.
Bane de hêrişanê dewlete de 2 kesî ameyî qetilkerdene, Dîwandere de 2 kesî birîndar bîyî. Lorîstan de Xuremawa de hêzanê dewlete çalakîkerî dayî guleyan ver, Birucêrd û Miyandwa de çalakîyanê şermezarkerdişî dewam kerd.
Xeylêk şaristanan de hêzanê Îranî verê xoverdayîşê şarî de neçare mendî ke xo apey biancê.
Kerec, Meşhed, Erak, Şuş, Zahidan û şaristananê bînan ê Îranî de zî çalakîyê şermezarkerdişî ameyî kerdene.
Goreyê Rêxistina Efû şanê çarşemeyî ra nata 8 kesî ameyê qetilkerdene. Şaristanê Amolî de zî 2 endamê Besîcî kişîyayî.
Goreyê rêxistinanê heqanê merdiman û muxalîfan destpêkê serewedaritişî ra nata tewr tay 260 kesî ameyê qetilkerdene û bi des hezaran kesî ameyê destbendkerdene.
