Dima ke 16ê êlule de cinîya kurde Jîna Emînî amebî qetilkerdene Rojhelatê Kurdîstanî û Îranî de şar sere wedaritbi.  Rixmê hêriş û gefanê dewlete serewedaritişê şarî di mengî yo dewam keno.

Rêxistina Heqanê Merdiman a Kurdîstanî (KMMK) derheqê binpaykerdişê heqan de raporê serê 55 rojan amade kerd. Rapor de dîya zanayene ke dewleta Îranî nê 55 rojan de bi hawayêkê sîstematîkî heqê şarî binpay kerdê û nê binpaykerdişî vera zêdîyayê.

KMMKyî pare kerd ke nê 55 rojan de Rojhelatê Kurdîstanî de 130ê ci cinîyî 775 kesî ameyê destbendkerdene û beno ke hûmara raştikêne naye ra zêdeyêr a. Rapor de ame vatene ke çalakîyan de dewleta Îranî Rojhelatê Kurdîstanî de 67 kesî qetil kerdî û tewr tay zî 37 kesî zî birîndar kerdî.

Goreyê doneyanê rêxistinanê heqanê merdiman û muxalîfanê Îranî zî heta nika pêro herêman de çalakîyan de tewr tay 500 kesî ameyê qetilkerdene, bi des hezaran kesî ameyê destbendkerdene û tepiştene. Goreyê agahîyan derheqê tay kesan de zî cezayê îdamî dîyayê.

Goreyê dîmenanê ke medyaya dîjîtale de ameyê vilakerdene, bi desan şaristanan de çalakîyî dewam kenê.