Qetilkerdişê Jîna Emînî ra dima 16ê êlule ra nata Îran û Rojhelatê Kurdîstanî de serewedaritişê şarî dewam keno.

Dîmenanê medyaya dîjîtale ra yeno famkerdene ke roja yewşemeyî Rojhelatê Kurdîstanî de Pîranşar, Serdeşt, Bokan, Mahabad, Sine, Seqiz, Merîwan, Dêwland, Kamyaran, Dîwandere, Pawe, Ciwanro, Kirmaşan, Îlam û Ûrmiye de şar vejîya waran û verê hêzanê dewlete de bendî nayî ro.

Bi taybetî Mehabad de hêzê Îranî pê çekanê giranan hêrişê şarî kenê. Yeno vatene ke hêrişan de tankî zî şuxilîyenê.  Ame parekerdene ke Sine, Ciwanro, Pîranşar, Merîwan û Dêwlan de hêzanê dewlete roja yewşemeyî 8 kesî qetil kerdî.

Dîmenanê Ciwanroyî de dîyeno ke vera şarî çekê otomatîkî şuxilîyenê û roniştoxê şaristanî xîret kenê ke birîndaran wedarnê. Yeno vatene ke şaristan de vera çalakîkeran çekî şuxilîyenê û 2 kesî ameyî qetilkerdene, xeylêk kesî zî birîndar bîyî. Şaristan de dima bi sloganan û bi beşdarîya bi hezaran kesan cenazayî ameyî definkerdene.

21ê teşrîna peyêne de, roja dişemeyî Pîranşar de bi hezaran kesî tewrê merasîmê cenazaya Karwan Qader Şukrîyê 16 serrî bîyî ke hetê rejîmê Îranî ra amebi qetilkerdene. Kirmaşan de rojê 40. yê qirkerdişê Sîna Naderî de bi seyan kesî vejîyayî waran. Dewa Bawerizî ya Sine de şar bi sloganê 'Mahabad têna nîyo' vejîya waran.

Şaristanê Dehgulanî de merasîmê cenazaya Muhsen Nîazîyî de sloganê 'şehîd nêmirenî' ame vatene.

Goreyê çimeyanê herêmîyan hêzanê Îranî hewteyê vîyarteyî de tewr tay 30 kesî qetil kerdê.

Çalakîyanê şarî şaristananê Îranî Tehran, Îsfahan û Şîrazî de zî dewam kerd. 6 kesan rê seba ke tewrê çalakîyan bîyê cezaya îdamî dîyaye.

Goreyê Rêxistina Heqanê Merdiman a Îranî 16ê êlule ra nata 43yê ci domanî 378 kesî ameyê qetilkerdene û bi des hezaran kesî zî tepişîyayê.