Tay rojnamegerî Amed de kom bîyî û rojnameyêko kurdkî vet. Hûmara yewîne ya rojnameyê Xwebûnî (xobîyayîş) yo ke do hewte de reyêk vejîyo ewro vejîyaye. Rojname hem bi kirmanckî hem zî bi kurmanckî weşanîyeno û nuştoxê rojnameyî Herêma Federe ya Kurdîstanî, Rojhelat, Rojawan, Kazakîstan, Ermenîstan, Lubnan û Ewropa ra yê.

Heyetê weşanî Samî Tan, Şener Ozmen, Felemez Ulug, Agîd Yazar, Mizgîn Ronak, Yildize Çakar, Ramazan Oçen, Ayhan Erkmen û Wisif Zozanî ra yeno meydan. Heyetê nuştoxan ê rojnameyê bi 12 rîpelan zî  Ebdullah Pêşew, Ehmed Huseynî, Kakşar Oremar, Kinyas Îbrahîm Mîrzoyev, Selîm Temo ve Zerdeşt Haco heman wextî de Heyetê Şêwirmendan de cagênê.

Rojnameyê Xwebûnî de babetê xebere, analîz, cigêrayîş, xoşebere û dosya cagênê. Rojname de hem meseleyê rojane û polîtîkî hem zî meseleyê cuye, cinîye, ekolojî, huner, kultur, edebîyat, ziwan û tarîxî do bêrê ercanayene. Rojnameyê Xwebûnî do bale bianco nuşteyanê ke ziwanê ci zelal ê la hetê tedeyî ra zengîn ê û nuxtoxanê taybetan ser.

Wayîrê Îmtîyazî yê rojnameyê Xwebûnî Kadrî Esenî îfade kerd ke ê do armanc bikê ke ziwan û kulturê kurdan bêrê cigêrayene, meseleyê rojaneyî û polîtîkî rojname de bêrê muneqeşakerdene. Esenî ard ziwan ke heta ke wendoxê kurdkî wayîrê rojnameyî bivejîyê, rojname do bibo wayîrê emirderg û serkewte.

Esnî pare kerd ke prosesê winasênî de ke rojnameyî apey şinê rojname çapkerdiş rîskêko pîl o û rojnameyê Xwebûnî metropolan de zî do bêrê vilakerdene. Esenî vat ke ''Kurdkî biwanê û bidê wendene'' û venga wendoxanê kurdkî da ke wayîrê Xwebûnî bivejîyê.