Barzanîyan tim zerrîya kolonyalîst û îşxalkeranê Kurdîstanî weş kerde.  Nê nûşteyî de ma do pratîkanê îxanetî yê Barzanîyan ser o vinderê.

Tay çimeyî vanê ke Barzanîyî Vakurê Kurdîstanî ra ameyê şîyê Barzan de cabîyê. Tayê çimeyê bînî zî vanê ke Barzanîyî yahûdî yê û wextê abûkadnazarî de Başûr de cabîyê. Herêma Barzanî Barzanîyan ra ver zî est bîye. 

Keyeyê Barzanîyan hêverî ame herêma Zaxo/Dihok/Amediyê, dima şi wareyê Zê. Coka keye sey 'Keyeyê Verê Zê' şinasîyeno. Keyeyê Barzanîyan 1850 ra dima bi tarîqatê Neqşîbendî bitesîr bi û bi eşîre. Mesûd Barzanî kênaya lajê Şêxê Barzanî Mehemed Xalidî de zewijîya. Bi nê hewayî keyeyê Barzanîyan hêdî hêdî bi qewetîn. 

Keyeyê Barzanîyan û PDK çimeyê îxaneyî yo verên o ke zerar dano Kurdîstanî û kulturê îxanetî yo. Barzanîyan destê xo eşt cayê Kurdîstanî yê parçebîyayeyî, rayberê nînan tasfîye kerdî. Welatperwer û serkêşanê parçeyanê Kurdîstanî zulmê PDKyî ra zaf antî. Mîsal;

*Serkêşanê Îran-PDKyî ra Silêman Mûînî hetê PDKyî ra ame qetilkerdene û cesedê ci teslîmê îsîxbaratê Îranî SAVAK ame kerdene.

*Sekreterê Îran-PDKyî Ahmed Tevfîk 1972 de Bexdad de hetê Baasî ra kişîya.

* Serkêşanê Partîya Demokrate ya Kurdîstanê Tirkîya (TKDP) Saît Elçî û Dr. Şivan (Saît Kirmizitoprak) bi fermanê PDKyî kişîyayî.

Xûlasa PDKyî pêro enerjîya xo daya ney ke partîya kurdan ê bînî xurt nêbê û bi fermanê MÎT û SAVAKî nê kiştî.

Barzanîyan tim zerrîya efendîyanê xo yê kolonyalîstan weş kerde. Barzanîyan qetî menfaetê kurdan û yewîya kurdan nêpawitî. Ê tim dûştê partî û serkêşanê kurdan ê bînan bîyî. Barzanîyî û PDK nika zî wazeno şexsê PKKyî de şorişê Vakurê Kurdîstanî bifatisnê û coka dewleta tirke de îtîfaq kenê.Barzanîyî û PDK celadê şoriş û şorişgêranê Kurdîstanî yê.

Barzanîyan tim xo sey efendîyanê Kurdîstanî dî. 'Reqîbê' xo zî bi rayîrê dewletanê bînan waşt tasfîye bikerê. Barzanîyan waşt ke bi rêxistina kontrayan a sey Stêrka Sor û KUKî hêrişê têgêrayîşê azadîye bikerê. Dima ke têgêrayîşê azadîye vilayê Başûrî zî bi 1983 de Barzanîyan peymanêka polîtîke îmza kerde. Dima ke PKKyî 1984 de dest pê têkoşînê çekdarî kerdbi PDKyî Rayber Apoyî ra waşt ke wa şer vinderno nêbo ê do vera têgêrayîşê azadîye şer bikerê. Seba ke PKK her ke şi bi hêzêr PDK verê ci de hêrs bi. Xora PDKyî dewleta tirke rê vatbi 'PKK verî ra nata dişmenê ma yo.'

Seba ke PKK bigêrîyo mîyanê lîsteya terorî Barzanîyan û PDKyî dewleta tirke reyde karêko hîra kerd. Netîceya ney de têgêrayîşê azadîye sey 'rêxistina terorî' ame pênasekerdene. Komployê Mîyanneteweyî yê vra Rayber Apoyî de zî rolê PDKyî zaf o. Dima ke 1ê hezîrana 2004î de têgêrayîşê azadîye ancî dest pê têkoşînê çekdarî kerd dewleta tirke û PDKyî şoq bîyî.

Dewleta tirke qetî nêwaşt statuyê Başûrî bişinasna. La dima ke têgêrayîşê azadîye ancî dest pê têkoşînê çekdarî kerd planê dewleta tirke zî xera bîyî. Dewleta tirke 21ê sibata 2008î de Zap de operasyonêkê 'teberê sînorî' da destpêkerdene  la bi giranî bin kewt û 28ê sibata 2008î de xo apey ant.

Şorişê Rojawanî, 2012 ra dima PDK û dewleta tirke ancî heman refî de bîyî. 2014 de hêrişanê DAÎŞî de û 2017 de wextê referandumî de dewleta tirke bi zelalî dişmenîya xo ya Başûrî mojnaye. La rixmê ney zî PDKyî Başûr, Rojawan û Şingal de hemkarîya hêrişanê dewleta tirke kerde. Hêverî nînan teyna îstîxbaratî dayêne dewleta tirke la 2020 de Zînê Wertê û 2021 de Garê de, 2022-23-24'an de her ca de Barzanîyî û PDK bi aktîfî bîyî parçeyê şerê vera gerîlayan.

Xeylêk kadroyê têgêrayîşê azadîye herêmanê binê kontrolê PDKyî de ameyî qetilkerdene. PDK û Barzanîyî her roje semedê paştdayîşê hêrişê dewleta tirke yê vera  gerîlayan rayîr virazenê, çeperan virazenê û Erdogano faşîst zî nînan rê sipas keno. Erdogano kiştox çira sipas keno? No bi xo nîşaneya îxanetî ya.