Qezaya Kerboranî ya Mêrdînî de 29ê teşrîna verêna 1995î û 8ê adara 1996î de 3ê ci  domanî 8 kesî ameybî destbendkerdene û ameybî vîndîkerdene. Serebûtî ra dima derheqê çawişê pisporî Bîlal Batir de û fermandarê qereqolî zî tede derheqê 18 kesan de bi îdîaya ''kiştişê bi zanayîşî'' dewa amebî akerdene. Dewaya ke hetê rayaumûmîye ra sey ''JÎTEMê Kerboranî'' yena zanayene, 30ê teşrîna verêna 2014î de dest pêkerdbi. Roniştişê dewa ewro Mehkemeya Cezaya Girane ya 1. ya Semsûrî de ame dîyene.

Abdûlazîz Altinkaynak, Omer Coşkûn, Abdûlkerîm Kaya, Osaman Seyban, Abmet Akyol ê ke merdimê xo vîn kerdî û avûkatê înan Erdal Kuzu û Azîz Turk beşdarê roniştişî bîyî.

Avûkatê dewa wazenê ke dozgerê Kerboranî yê ê çaxî Adem Kul sey şahîd bêro goştarîkerdene. La reyna nêeşkîyayî biresê adresê Adem Kulî. Heyetê mehkeme bi SEGBÎSî îfadeyê şahîdan Arîf Topçu, Muhammed Demîrel û Ahmet Çîçek ê ke o çax leşker bîyî ameyî girewtene. Her hîrê şahîdan zî sey versucan îfade da. Gerrekeran sey verî waşt ke versucî ceza bigêrê. Avûkatanê gerrekerdeyan zî  waşt ke seba ke adresê dozgerê verênî Adem Kulî bêro dîyene MÎTî rê nuşte bêro nuştene.

Heyetê mehkeme waştişê nuşteyî yê avûkatan red kerd û bire daye ke seba ke mutalaya ci bêra amadekerdene dosya bêra erşawitene dozgerêkê bînî. Dewa taloqê 29ê hezîranî ameye kerdene.