Kurdîstan û Tirkîya de merdimî vîrusê Korona ra mirenê. Goreyê doneyanê fermîyan ê Wezaretê Weşîye heta vizêr 52 hezar û 167 kesî pê vîrusê Korona kewtî û hûmara merdimanê ke vîrusê Korona ra merdî bîye 1101 kesî. Hukmatê tirkî 10ê nîsane de seba qedînayîşê hewteyî 31 şaristanan de qedexeyê vejîyayîşê teberî îlan kerd. Dima ke qedexe ame îlankerdene şarî seba hewcedarîyanê xo yê serekeyan verê xo da firin û merketan û îzdîhamî qewimîyayî.

Amed de roja destpêke kuçeyî veng bîyî. Dermamxaneyan û firinan ra berî pêro dikanî girewte bîyî. Semedo ke qedexe 22:00 de ame îlankerdene şarî nêrazîbîyayîşê xo mojna û vat: ''Verî ke ma amadekarîya xo bikerê, qedexe ama îlankerdene.'' Roniştoxanê Amedî vanê ke qedexeyê 2 rojan qîm nêkeno ke vîrus çin bikero. Amedijî ke nêeşkenê bivejîyê teber baxçeyanê keyeyê xo de wextê xo derbaz kenê.

Hemwelatîyê bi nameyê Mehmet Kurukanî vat: ''Ganî wextê qedexeyê teberî bêro dergkerdene. Labelê seba naye zî ganî îmkanî bêrê afernayene. Ma merdimê kedkar ê û seba ke debarê xo bikerê neçare yê ke bixebitê.''

Hemwelatî Nurettîn Ozkanî yo ke taxa Seyrantepe ya Amedî de şiwanîye keno vat: ''Ganî bira qedexeyî 4-5 saetî verê cû biameyêne îlankerdene. Ma hewcedarîyê xo yê bingeyîyî peyda nêkerdî. Seba ke ez şiwan a ganî ez heywananê xo biveja teber.''

Hema eşkera nîyo ke qedexeyê vejîyayîşê teberî do têna peynîya hewteyî yan zî rojanê bînan zî dewam bikero. Labelê vînayîşê roniştoxanê şaristanî no yo ke hewcedarîyê bingeyî yê şarî ganî hetê dewlete ra bêrê dayebe û heqê weşîye wextê qedexeyî de bêro pêşkêşkerdene.