Endama Koordînasyonê KJKyî Zerîne Rûken derheqê krîzê vîrusê Korona û rayîrê çareserîye de ANFyî reyde qisey kerd.

Qiseykerdişê Rûkene ra beşêk wina yo: 

''Kapîtalîzm û hêzê serdestî sebebê texrîbatê xoza û janê vîrusê Korona yê. Dinya mîyanê tengasî de ya. Nê wextî de têgêrayîşê şorişgêrî yê demokratîkî sey alternatîfê qetî xo mojnenê ra. Merdimîye mat mende. Ma nê prosesî de pêro gemarîya sîstemê modernîstî ya kapîtalîstî dîye. Seba awankerdişê komelê demokratîkî wext wextê hemle yo. Ganî ma sîstemê hegemonîkî, raştîya netewe-dewlete bivînê. Ganî ma bi lezî polîtîkaya winasêne biafernê ke hêrs û nêrazîbîyayîşê vera dewlete û sîstemî zêdêr bikera û komel hîşyar bikera. Eke ma ney bikerê jan do bido sîstemî ro. Çare têna paradîgmaya Rayber Apoyî û sîstemo konfederal-demokratîk o. Hêzê şorişgêrî, ekolojîstî, antî-kapîtalîstî, sosyalîstî, demokratîkî û cinîyî ganî têkoşînê xo pîlêr bikerê. Serra 2020î de rayîrê xelisîyayîşê nê krîzî ra, paradîgmaya demokratîk-ekolojîk û azadîperwerîya cinîye ya Rayber Apoyî ya.

Dewleta tirke seba ke vîrus Kurdîstan de vila bibo destê ci ra çi yeno kena. Her ca de vera vîrusî têkoşîn esto la AKP vera kurdan şer keno, qirkerdişan keno. Cenazaya gerîlayî pê kargo şaweno, hêrişê şehîdgehan keno. Ê xîret kenê ke pêro komel hewcedarê înan bibo. Hayîya şarê kurdî zî pê naye esta.

Qanûnê înfazî yê peyênî vera têdûştî yo. Îqtîdaro faşîst ê AKP-MHPyî pê janê vîrusî qirkerdişê kurdan dewam keno. Pê qanûnê înfazî zî tepişteyanê sîyasîyan lapanê mergî de verdeno. Zîndanan de bi desan nêweşî estê. La herinda înan de tecawuzkerî, kiştoxî vera dîyayî. Asayîşê komelî nêmend. Pê nê qanûnî ame qebulkerdene  ke dewlete dewleta tecawuzkeran û cergan a.

Komel wa vera nînan bêveng nêmano. Sere de Rayber Apo ganî pêro tepişteyî bêrê veradayene. Ma semedê janî ra qerilîyenê. Ganî keye û avûkatî şorê Îmrali. Ganî qesawetê şarê kurdî yê seba weşî û asayîşê Rayber Apoyî bêrê çareserkerdene.''