Nuştox Elî Kerîmîyî derheqê serewedaritişê Rojhelat û Îranî de qisey kerd û vat: ''Her kes wa bi baldarî nêzdîyê Îran û welatanê Ewropa bibo. Çunke nê hêzî kenê şorişê cinîyan armancê ci ra dûrî bivisnê.''
Aktîvîst û nuştox Elî Kerîmîyo ke Rojhelatê Kurdîstanî ra yo, derheqê serewedaritişê Îran û Rojhelatê Kurdîstanî de ANFyî rê qisey kerd.
Elî Kerîmîyî vist vîrî ke serra 1979î de şorişî rê komunîstan û çepgîran serkêşîye kerdene la dima têgêrayîşê Humeynî şoriş girewt binê kontrolê xo. Kerîmîyî vat: ''Tay hêzan têna o çax sloganê îslamî eştêne. O çax BBCyî qasetê Humeynî û mesajê ci cade vilayê pêro dinya kerdêne. Yanî peyê Humeynîyî de destekêko mîyanneteweyî bi. Amerîka zî seba ke çepgîr û komunîstî ser nêkewê paştî daye Humeynî. Çunke Amerîka nêwaştêne Yewîya Sovyetan pê serkewtişê Îranî yê çepgîran pîl biba.''
Kerîmîyî da zanayene ke şarê Îran û Rojhelatê Kurdîstanî nika dormeyê sloganê 'jin, jiyan, azadî' de pîya xo ver danê û vat: ''No slogan seba her kesî yo. Ewro Şîrazî ra heta Belucîstanî û pêro Kurdîstanî no slogan ziwanan ser de yo. La tay merdimî kenê ke no slogan armancê ci ra dûrî bivisnê. Qet yew dewlete sey Komara Îslamî ya Îranî xizmetê Amerîka û welatanê Rojawanî nêkena. Înan tim paştî daye Îranî. 70 rojî yo Îran de şorişê cinîyan dewam keno la heta nika qet yew dewleta Ewropa bi hawayêkê zelalî paştî nêdaya nê şorişî. Îsraîl zî a raşte nêwazeno ke Komara Îslamî ya Îranî bin bikewa. Ciwanê Îran û Rojhelatê Kurdîstanî Amerîka, Rûsya û Ewropa ra çîyêk nêpawenê. Ê bi ked û xîretê xo şorişî kenê. La hêzê sey Amerîka wazenê pê kayanê gemarinan verê şorişî bigêrê. Hetê bînî ra ganî ciwan û şarê Îran û Rojhelatê Kurdîstanî pê molayan zî bawer mekerê.
Îran zî peyê kayanê gemarinan de yo. Nika qaka Îslah Talebe yena kerdene. La Îslah Talebe merdimanê dewlete ra yena pê. Ciwanî wa pê înan zî bawer mekerê. Ganî partîyê Îran û Rojhelatê Kurdîstanî sey domananê xo tewrê çalakîyan bibê û çalakîyan pîl bikerê. Dadî û babîyî zî wa tewrê çalakîyan bibê, hetê ciwanan de cabigêrê.
Wa her kes verê lobîyanê Îranî, partîyanê klasîkan û welatanê Ewropa de baldar bibo. Çunke nê hêzî wazenê ke Şorişê Cinîyan armancê ci ra dûrî bivisnê. Ez hêvî kena ke no şoriş do ser bikewo. Îran xora naye ra pey do nêagêro rojanê verênen.''
