Sakik: Mûş de ma do heqê xo bigê
Mûş de 2 hezar û 500 rayê HDP’yî ameyî betalkerdene, HDP’yî zî îtîraz kerd. Namzedê hemşaredarîye Sirri Sakikî vat; “Ma do heqê xo nêdanê tu kesî” û vengdayîş bi şarî kerd ke îradeyê xo ra wayîr bivejîyê.
HDP’yî Mûş de derheqê netîceyanê weçînitişî de û nêzdîyê 2 hezar û 500 rayê înan ê ke ameyî betalkerdene de eşkerayîya çapemenîye daye.
Parlamenterê HDP’yî Gulîstan Kiliç Koçyigîte, Mensûr Işik, namzedê HDP’yî yê hemşaredarîya Mûşî Sirri Sakik û Sîbel Gençe beşdarê eşkerayîye bîyî. Sakikî kerd û vat, goreyê doneyê ke destê înan de netîceyê weçînitişî yê ke hetê Ajansê Anadolû ra ameyî eşkerakerdene, rast nîyê.
Îradeyê xo rê wayîr bivejîyê
Sakikî da zanayene ke goreyê cigêrayîşê înan 103 sindoqan de şaşîye ameya tesbîtkerdene,2 hezar û 500 rayî ameyî betalkerdene û seba ke reyna hûmaritiş bêro kerdene ê do îtîraz bikerê. Sakikî vat wexto ke AKP îtîrazê netîceyan keno YSK qebûl keno. Sakikî vengdayîş bi şarî rê ker ke wa îradeyê xo rê wayîr bivejîyê.
Eşkerayîye ra dima heyetê HDP’yî şi Heyetê Weçînitişî yê Bajarî û îtîrazê netîceyanê weçînitişî kerd.
