Namzedê HDP’yî yê Mûşî Sirri Sakikî derheqê hûmaritişanê rayan ê ke hîna bajar de dewam kenê de serê hesabê xo yê Twîtterî ra zanayîşî dayî.

Sakikî, wina vat: “Mûş de çîyê ecêbî qewemîyenê. Hûmaritişê bajarê ke bi mîlyonan weçînayoxî tede estê qedîyayê, labelê Mûş de hîna netîceyêk çin o. Nisbetêk xeylî gird rayê ke ameyê îptalkerdene estê. Netîce hîna bewlî nêbîyo. Ma pawenê.

Ma hevalanê xo reyde heyetê weçînayîşî de nobete de yê. 2500 rayî ameyê îptalkerdene, hîna tu serkewtişêk çin o, rayî ameyî diznayene. Wa heme şarê ma bizano ke ma do nê bêhuqûqîyan vejê werte û ser bikewê.

Bajaro ke se ra 94 rayî ameyî hûmaritene de, nisbetê rayan;  AKP bi 15 hezar û 71 rayan se ra 33,23 de, HDP zî  bi 14 hezar û 427 rayan se ra 31, 81 de yo.

Îqtîdar Mûş de dimayê dep û dolaban de yo. Mûşo ke AKP vîndî kerdo de bi saetan o cikewtişê doneyî nêno kerdene. Ma sindoqan ca nêverdanê. Ma heyetê weçînayîşî de yê, ma îtîrazanê xo kenê û ma destûr nêdanê ke îradeyê ma bidiznê!”