Hemsereko Pêroyî yê HDPyî Mîthat Sancar, wekîlê HDPyî Merale Daniş Beştaş, Îmam Taşçier, Alîcan Onlu, Nusrettîn Maçîn, Nejdet Îpekyuz û temsîlkarê partîyanê kurdan New Garden Otêle de qezaya Yenîşehîrî ya Amedî de pîya roniştî.  Hemserekê KCDyî Bedran Ozturk, Hemserekê DBPyî Salîha Aydenîz û Keskîn Bayindir, Partîya Merdiman û Azadîye (PÎA), Partîya Komunîste ya Kurdîstanî (KKP), Platformê Demokratan ê Kurdan (PDK-Vakur), Partîya Demokrate ya Kurdîstanî ya Tirkîya (PDK-Tirkîya) û Partîya Azadîye tewrê kombîyayîşî bîyî. 

Temsîlkaranê partîyan yewîya kurdan ser o nîqaş kerd. Nîqaşan ra dima Sancarî eşkerayîye daye û wina qisey kerd:

''Ma ewro xeylêk babetan ser o nîqaş kerd û ma bire daye ke ma nê platformê xo yo ke Îtîfaqê Weçînayîşî yê Kurdistanijî de ca girewt, mende bikerê. Ma seba naye gama verêne eşte. Ma çarçewa na bire de xebatanê xo bikerê. 

Ma sey HDP nê pêvînayîşan zaf girîng vînenê. Seba ma yewîya kurdan zî zaf girîng a ke ewro binê gefî de ya.  Ma bi hîşmendîya na berpirsîyarîye yenê têkişt. Tirkîya de demokratîkbîyayîş têna pê beşdarîya kurdan mumkîn o. Xebat û têkoşînê ma yê seba ameyoxî hêvî danê ma.

Ma vera hêriş û tedayanê HDPyî seba paştdayîşê partîyanê îtîfaqê kurdîstanî zaf sipas kenê. Mesajê paştdayîşê înan ma kêfweş kenê û pîlkerdişê nê îtîfaqî ma dilşad keno. Ma do xeylêk xebatan pîya bikerê. Ma vînenê ke rayîrê ma akerde yo. Ma do reyna tîya de pêro embazan bikerê meymanê xo.''