Endamê Komeleya Huqûqnasan a Seba Azadîye (OHD) Avûkat Berdan Acunî derheqê hêrişanê kîmyewîyan, huqûqê serê hêrişanê kîmyewîyan de ANFyî rê qisey kerd.

Acunî da zanayene ke wextê Şerê Dinya yê Diyînî de seba ke çekê kîmyewîyî bîyî sebebê texrîbatêkê pîlî vera înan tay mekanîzmayî ronîyayê. Acunî vat: ''Peymana Cenevre ya 1928î yanî Konvansîyonê Cenevre zî nînan ra yew a. Peymana Cenevre binê sîwana Neteweyanê Yewbîyayeyan de ya. Tirkîya 1997 de na peymane îmza kerde. Goreyê na peymane Tirkîya nêeşkena çeka kîmyewîye ber bîyara, bikirişa û envanterê xo de peyda bikera. Nika delîlê cidî est ê ke vanê dewleta tirke Başûr de çekanê kîmyewîyan şuxilnena. Ganî terefgîrê na peymane herême rê heyetan bişawê û hêrişanê kîmyewîyan ser o cigêrayîşî bidê destpêkerdene.''

Av. Acunî bale ante raporê IPPNWyî ser û vat: ''Ganî hînî Sekreterîya Neteweyanê Yewbîyayeyan (NY) bikewa dewre û heyetan bierşawa herême. OPCW û dezgehê winasênî mîsyonê xo ra cigêrayîşan kenê. Heyetê xoserî raştê astengîyan yenê. Ganî OPCW vera nê astengîyan bikewo dewre, tedbîran bigêro. Xora peymane de eşkera yo ke NY seba asayîş û cigêrayîşê heyetanê xoseran têbigêro.''