Serekkomaro Tirk Tayyîb Erdogan par şibi serdana Xêlatî yê Bedlîsî û bado zî vatibi Xêlat de do ‘’Koşka Serekkomarîye bêro viraştene’’, menga vîyarteye de înşaatî dest pêkerd. Xebatê awankerdişê ‘’Koşka Serêkkomarîye’’ ya ke qeraxê Gola Wanî de serê 32 donim erazî de do bêro viştene, zirarêko gird dano xozaye.  

Koşka Serekkomarîya Tirkî bi çarçewaya polîtîkaya asîmîlasyonî yena awankerdene.

Înşaat bi dizdîye yeno viraştene

Xebatê awankerdişê koşke Nîsane de dest pêkerdî û amanc o yo ke Tebaxe de bêro qedênayene. Bi dîzdîye koşke yena viraştene. Xeylî xebatkarê ke awankerdişê koşke de xebitîyenê bi bihaneyo ke cayê înşaatî de fotograf anto, karî ra ameyî eştene. Koşke hem serê erdî ra hem zî serê gole ra yeno awankerdene. Seba ke înşaat der û dor ra nêro dîyayene û fotografê ci nêrê antene dorê ci ameyo girewtene.

Xêlato ke tu berardiş çin o û nisbetê bêkarîye resto se ra 80, seba koşka Erdoganî yo ke bi mîlyon lîrayan do bêro viraştene, şarê Xêlatî reaksîyon da. Şarê Xêlatî vat, rîyê bêkarîye ra şar Xêlat û Bedlîsî ra remeno, ê herinda koşk û serayan de kar wazenê.