Berpirsê Têkilîyan ê Merkezê Yewîya Niştimanî ya Kurdîstanî (YNK) yê Mûsilî Xeyas Sûrçîyî peymana Hewlêr û Bexdadî ya Şingalî ser o ANFyî rê ercnaye.

Sûrçîyî bale ante ser ke na peymane mabênê PDK û Hukmatê Iraqî de ameye kerdene, mabênê Hukmatê Herêma Kurdîstanî û Hukmatê Iraqî de nê. Sûrçîyî vat: ''Ma rê çîyêk nêame perskerdene. Ma paştî nêdanê na peymane. Çira têna Şingalî ser o înan pêkerd. Ma pê naye kewtî şik. Ma paştî danê agêrayîşê şingalijan û pê agêrayîşê înan keyfê ma zî yeno. Tay dewletanê teberî Şingalî ser o pêkerd. Goreyê tay provakasyonan PKK nêverdano ke şingalijî abigêrê. La no raşt nîyo. PKKyî êzidîyî pawitî û resnayî koyanê Şingalî.''

Sûrçîyî derheqê propagandayanê vera YBŞ û YJŞyî de nê çîyî vatî: ''Nê laj û kênayî şarê Şingalî ra yê. Bi na peymane înan rê yeno vatene ke Şingal de nêmanê. Şingal de nêmanê şorê kamca? Raşt o ke nê hêzî fikrê Apoyî ser o yê la np nêno a mana ke PKK ra yê. Şarê Şingalî hînî sey verî nîyo. Kes nêeşkeno Şingal roşo. Ê dost û dişmenê xo hol zanenê. Hînî çew nêeşkeno înan bikişo.''