Hewayê germî de bi hezaran merdimî seke xar kenê Dêrsimî. Semedo ke nufusê Dêrsimî nişka ra zêdîya fauna û floraya Parka Mîlî ya Gelîya Munzurî binê tehlukeyî de ya.

Cehdkerdişê Pawitişê Mîrasê Xozayî û Kulturelî yê Dêrsimî derheqê mesele de eşkerayîyêke daye.

Avûkat Bariş Yildirimî û Vervatoxê Cehdkerdişê Pawitişê Mîrasê Xozayî û Kulturelî yê Dêrsimî nameyê dezgehî ser o qisey kerd û pare kerd ke înan semedo ke Gelîya Munzurî sey warê sîtî bêra îlankerdene dewa akerde ke floraya ci zaf zengîn a.

Yildirimî da zanayene ke seba pawitişê parke ganî tede hêzê asayîşî ca bigêrê û vat: ''Her kes yeno şino na parke. Rîyê erdiman ra pezkovîyî nêaftenê bêrê çemî ra awe bişimê, wesayîtî vera danê heywanan ro. Îdareyê Parka Gelîya Munzurî nêeşkeno parke îdare bikero! Ganî no habîtat û floraya Dêrsimî bêrê pawitene. Rixmo ke qedexe yo masêyê gelîye tepişîyenê, merdimî her ca de kampe kenê, pîknîk kenê, daran birnenê. Ma venga selahîyetdaran danê ke wa tedbîranê hewceyan bigêrê. Eke şima çîyêk nêkerê ma do muracatê huqûqî bikerê.''