Îdareyê Yewîya Niştimanî ya Kurdîstanî (YNK) ra Eta Serawîyî pare kerd ke îstîxbaratê tirkî MÎTî Zînî Wertê de hêzêkê PDKyî reyde gerîlayan teqîb keno. Serawîyî derheqê babete de dîmenêk zî pare kerd.
Eta Serawîyî RojNewsî reyde qisey kerd û bale ante têkilîyanê mabênê PDK û MÎTî ser. Serawîyî da zanayene ke PDK seba şerê vera PKK û YNKyî şîyo Zînî Wertê û vat: ''Înan vera ma û PKKyî bira şerî daye. Labelê ma û PKKyî bahaneya înan pûç kerde. Hemserekîya ma û way ûbirayanê ma yê PKKyîjan nêverda ke planê PDKyî û MÎTî ser bikewê.
Fermandarîya hêzanê Hekgurtî yê PDKyî tîmêkê MÎTî reyde waranê gerîlayan de PKK teqîb kena. Şewe zî teyarayê şerî yê tirkî nê waran ser o bombayan varnenê.''
Serawîyî seba na îdîaya xo zî dîmenêk weşana. Goreyê Serawîyî no dîmen dewêka herêma Wertê Zînî de ame girewtene. Serawîyî eşkera kerd ke di wesayîtê sipî yê ke nê dîmenî de asenê aîdê MÎTî yê û nê wesayîtî rojêke verê cû hêrişê hewayî yê dewleta tirke yê 15ê nîsane de Zînî Wertê de ameyî dîyene.
