Silopîya de dima ke polîsan nêverda şar vera qirkerdişê xoza rayraşîyayîşî bikero, şarî dest pê çalakîya roniştişî kerd. Wekîla Partîya Çep a Keske Newroze Uysal çalakîye de vat ke oyo ke qewimîyeno tecrîd û îzolasyon o.

Rêxistinê komelê sivîlî, partîyê sîyasîyî, Mayê Haştîye û rêxistinê ekolojîkî serkêşîya TJA de û bi şîarê 'Ma Cûdîyî ra heta Akbelenî xoza û cuye pawenê' kom bîyî û înan waşt ke taxa Cûdîyî ya Silopîya ya Şirnexî de rayraşîyayîşêk bikerê.

Wekîlê Partîya Çep a Keske Zeynepe Oduncu, Newroze Uysal, Zekî Îmrez û Sebahat Erdogan Saritaş zî hetê girseyî de bîyî. Rayraşîyayîşî ra verî girse verê bînaya Partîya Çep a Keske ya Silopîya de hetê polîsan ra gêrîya binê ablûqa û destûr nêda rayraşîyayîşî.  Wekîle Newroze Uysal qanûn vist vîrî la polîsan vat: ''Ma do destûrî nêdê.''

Girseyî dima verê bînaya partîye de eşkerayîye daye. Newroze Uysal tîya de qisey kerd û vat: ''Ma waşt ke vera talanê xozaya Cûdîyî rayraşîyayîşêkî bikerê la gêrîyayî binê ablûqa. No kerdiş kerdişêko bêhuqûqî û keyfî yo. Ewro koyê Kurdîstanî seba xalîkerdişî û polîtîkaya koçberkerdişî yenê qirkerdene. Ma polîtîkayanê şerî yê vera cografyaya Kurdîstanî qebul nêkenê. Têkoşînê ma do tim dewam bikero.''

Nameyê Têgêrayîşê Ekolojî yê Mezopotamya ser o Murat Bîlgîçî zî ard ziwan ke Kurdîstan de ekolojî yena qirkerdene. Bîlgîçî vat: ''Bêrê ma pîya verê qirkerdişê xoza bigêrê.''

Dima girseyî bi sloganê 'Bijî berxwedana Cûdîyî' çalakîya roniştişî kerde.