Qezaya Pirsûsî ya Riha de ya ke sînorê Kobanê de ya serkêşîya DEM Partî, DBP û TJA de çalakîya nobete dîyaye destpêkerdene. Xeylê temsîlkarê partîyanê sîyasîyan û dezgehanê komelê sîvîlî tewrê ci bîyî.

Rixmê astengkerdişê polîsan bi seyan kesê ke rayîrê Kobanê-Pirsûsî de ameyî têhet verê nobete eşkerayîye daye.

Hemserekê DBPyî yê Amedî Şîrîn Gurbuzî vat: ''Hêrişê vera Kobanê eynî wextî de vera îtayî benê. Ma venga her hetî danê, ma bibê yew, PDK zî tede. Ma sînorê Kobanê de vanê hinî bes o. Ma xoverdayîşê Kobanê selam kenê. Bijî berxwedana Kobanê.''

Wekîlê DEM Partî yê Riha Omer Ocalanî zî vera qetilkerdişê Nazim Daştan û Cîhane Bîlgîn hêrsê xo ard ziwan û nê vatî: ''Ma getilkerdişê rojnamegeran şermezar kenê. Kurdî semedê haştîya bianore cehd kenê. Ma dişmenî çewî nîyê. Kobanê de vera DAÎŞî têkoşîno gird ame dayene. Dinya Kobanê eşnawit. Polîtîkaya Tirkîya ya vere Rojawanî hetê çewî ra nîna qebulkerdene. Rojawan de vera wayûbirayanê ma şerêk est o. Heqê kurdan est o ke bibê wayîrê statuyî. Ma paştî danê hêzanê kurdan. Ganî pêro kurdî verê xo bidê Rojawanî. Ganî kurdî sey heyetêk şirê Şamî. Ma koletîye çirey qebul nêkerd, ma do mekerê. Fîkr senî beno wa bibo ganî her kes semedê yewîye cehd bikero.''

Rojnamegere Ceylane Şahinli zî qetilkerdişê Nazim Daştan û Cîhane Bîlgîn şermezar kerd û vat: ''Embazê ma semedê heqîqetî ameyî qetilkerdene. Embazanê ke waşt semedê embazanê xo yê şehîdan vengê xo vejê ameyî tepiştene. Pawitişê Nazim û Cîhane semedê ma meseleya anor a. Ma do heta peynî wayîrê tekoşînê înan bivejê.''

Temsîlkarê Karê Çapemenîye yê DÎSKî Hakî Boltan zî vat: ''Heta ke Çapemenîya Azade bibo raştîye tarî de nêmanena. Ma do şehîdanê Çapemenîya Azade teqîp bikeêr.''

Eşkerayîye bi slogananê “Şehîd namirin” û  “Nazım û Cîhan rûmeta meye" qetîyaye.