DBP, Partîya Komunîste ya Kurdîstanî (KKP), Partîya Azadîye, Partîya Însan û Azadîye (PÎA), Komeleya Kurdan a Şorişgêre û Demokrate (DDKD), Komeleya Şêx Seîdî û Platformê Yewîya Cinîyan ê Kurdan derheqê hêrişanê vera Rojawanê Kurdîstanî de eşkerayîyêka hempare daye. Hemsereka DBPyî Çîgdeme Kiliçgun Uçar û temsîlkarê partî û dezgehanê bînan zî tewrê eşkerayîye bîyî. 

Eşkerayîye ra dima Serekê Pêroyî yê Partîya Azadîye Ayetullah Aşitîyî vat: ''Ganî ma bi yewî têbigêrê. Eke ma yewîya xo awan bikerê, do ser bikewê. Azadîya kurdan û çareserîya meseleya kurdan pabesteyê yewîya ma ya.Ganî ma Rojawan de pîya têbigêrê.''

Partîya Komunîste ya Kurdîstanî ra Yasîn Yetîşgenî vat: ''Rojawanî heta nika bedelê giranî dayî û tayê destkewteyî vistî destî. Ganî nê firsendî hol bêrê ercnayene. Dewleta tirke ganî himnî kurdan sey 'terorîstan' pênase nêkera, QSDyî de pêvînayîşan bikera û meseleyan bi dîyalogan çareser bikera.''

Vervatoxê DDKDyî Abdulhey Okumuşî vat: ''Ganî kurdî yewîya xo awan bikerê, statuyê Rojawanî bipawê. Ganî kurdî Rojawanî bi dinya bidê qebulkerdene.''

Endamê Komeleya Şêx Seîd Azad Zalî vat: ''Kurdan qetî sereyê xo nêard war. Tewr zaf şarê kurdî azadîye û statuyî heq keno.''

Hemsereka DBPyî Çîgdeme vat: ''Rojawan de şarê kurd, ereb, sûryanî est ê. Nê şaran rixmê her çîyî zî sîstemê xo awan kerd. Ma do heta peynî nê sîstemê Rojawanî bipawê. Bi pawitişê ci ganî ma Rojawanî rê deynê xo bidê.''