Meclîsê Cinîyan ê DEM Partî 22yê kanûne de Anqara de kombîyayîşêk kerdbi û derheqê bernameyê rêxistinkerdişî û têkoşînî de birî dabî. Meclîsê Cinîyan netîcenameyê kombîyayîşî eşkera kerd.

Netîcename de ame îfadekerdene ke cinîyî rixmê hêriş û tedayan zî kuçeyan nêteriknê û têkoşînî ra fek vera nêdê.

Netîcename de bale ameye antene tecrîdê Îmraliyî ser û wina ame vatene: ''Tecrîdê vera Birêz Abdullah Ocalanî hem çareserîya meseleya kurdan asteng keno hem zî şerî xorinêr keno.'' 

Netîcename de ame vîrvistene ke rijîyayîşê Sûrîye ra dima hêrişê dewleta tirke yê vera kurdanê Rojawanî zêdîyayê û nê hêrişî zerar danê rewşa nikayêne. Meclîsê Cinîyan venga pêro kesan da ke vera hêrişan dormeyê Rojawanê Kurdîstanî de bêrê pêser û wayîrê Şorişê Cinîyan ê Rojawanî vejîyê. 

Meclîsê Cinîyan vat ke ê do vera şerî têgêrayîş, rêxistin, dezgehanê cinîyan, sîyasetmedaran, femînîstan de bêrê yewca, derheqê ekolojî, rejîmê qeyûman, xizanîya cinîyan, polîtîkayanê şerê taybetî, koçberan û sîyasetê îqtîdarî de têkoşîno hempar bikerê.

Meclîsê Cinîyan wina veng da: ''Bêrê ma pîya serkêşîya cinîyan de haştîya rûmetêne aan bikerê. Ganî Sûrîyeya newîye de cinîyî cabigêrê. Ma vera hêrişanê modelê Rojawanî bi felsefeya Jin, Jiyan, Azadî têbigêrê û paştdayîşê enternasyonelî aver berê.''