Dewleta tirke mabênê Rojhelat û Vakûrê Kurdîstanî de dês nana ro. Dêso ke heta ke 43 kilometre ameyo viraştene,heta nika hendekê ci de di meyîtî ameyî dîyene.

Pê ronayîşê dêsan xeylêk warî semedê dewanê sînorî do bêrê qedexekerdene. Dewleta tirke ya ke verî kalekolî viraştî û dima ra dêsî nayî ro pîya bi nê dêsan hendekan zî kenana. Waştişê ci oyo ke kurdê ke wird hetanê sînorî de ciwîyenê û merdimê yewbînan înan cêser bifîno û bi temamî yewbînan ra raqilno.

Hedêkê ke sînor de bi îdîaya 'asayîş' yenê kendene de di menganê peyênan de meyîtê di camêrdan ameyî dîyene. Meyîtê ke hetê leşkeranê qereqolê dewa Axrokî ya sînorê Rojhilatî ra ameyî dîyene, hema nasnameyê înan eşkera nêbîyî. Yeno texmînkerdene ke nê kesê ke morgê Nêweşxaneyê Dewlete yê Qelqeliya  rê ameyî wedaritene de macîr ê.

Selehîyatdarî îdîa kenê ke wird macîrî gama ke sînorî ra ravêrtene kewtê hendekan la kesê ke qewimîyayîşî rê bîyî şahîd vanê nê kesê hetê leşkeranê wird hetanê sînorî ra raştê îşkenceyî ameyî û dima ra erzîyayî hedekan.

Goreyê dewijanê sînorî leşkerê tirkî û îranî pîya bi qoricîyan babeta macîran sey warê rantî şuxulnenê û ekîbê ke organîzekerde pîya qaçaxan xebityenê estê. Nê grûbî semedê ravêrtişî macîran pere genê û êyê ke pere înan nêdanê û xoser sînorî ra ravêrene înan rê îşkence kenê û mirênenê. Dewijan ard ziwan ke no dês zî seba ke warê leşkerî zafêr bê yeno viraştene.