Sîyasetmedarê kurdê ke surgun de ciwîyenê derheqê vengdayîşê Rayber Apoyî û qerarê qedînayîşê têkoşînê çekdarî yê PKKyî de erjnayîşî kerdî.

Endamê KNKyî Dr. Mecît Hasoyî wina vat: “Kurdan çirey şer nêwaşt. Tim wazenê ke mîyanê haştîye de bi ziwan û nasnameyê xo biciwîyê. Serê herre û şarê ma de bazarîyî ameyî kerdene. Bedelê tewer girdî kurdan dayî. Hêzê serdestî nêwazenê kurdî bibê yew. PKKyî xora semedê haştîye çeke girewt. No vengdayîş firseto gird o. Ma pêro berpirsîyarê ke nê firsetî semedê şarê xo bierjnê.” 

Endama KNKyî ya Amerîka Esrîn Kedrî zî nê vatî: “Ez sey cinîyêke bitaybetî zî sey cinîyêka rojhelatije zerrîya safî ra paştî dana vengdayîşê Birêz Abdullah Ocalanî. No vengdayîş semedê pêro kurdan ê welatperweran û Kurdîstanî yo. Kam ke wayîrê dewaya Kurdîstanî vejîyeno gerek wayîrê nê vengdayîşî bivejîyo. Ez sey cinîyêka kurde veng dana dayîkan ê kurdan: Ma zafêr berpirsîyarîye bîgîrê. Ma dahîna zaf wayîrê şar, dezgeh, ziwam û kulturê xo bivejê. Ma ça ra benê wa bibê, bawerî û pêvînayîşê ma yo sîyasî çi beno wa bibo gerek dewaya ma ya hempare têkoşînê şarê ma bo. Gureyê ma yo verên o yo ke ma cuyêka azad û seyyewbîne înşa bikerê.” 

Serekê Deutsch-Kurdisches-Forum e.V. Dr. Yûnis Behramî zî wina vat: “Hinî çareserîya bi rayîranê demokratîkan a semedê meseleya kurdan têna waştişê kurdan nê waştişo hempar ê rayapêroyîya dinya yo zî. Goreyê mi eke no proses bi têkoşîn û stratejîya raşte bêro rayraberdene beno ke Başûr de federalizm, Rojawan de xoserî û Vakur de sîstemê sey eyaletî bêro pêardene.”