Endama Konseya Hemserekîya Pêroyî ya KCKyî Sozdare Avesta bernameyêkê taybetî yê Stêrk TVyî de rojdem ercna.

Sozdare Avesta bale ante pêvînayîşanê peyênan ke Rayber Apoyî rede ameyî kerdene û vat Erdogan û AKP zelal nîyê. Avesta vist vîrî ke badê pêvînayîşan her çî ame rojdem la heqê Rayber Apoyî nêameyî munaqeşekerdene û vat, ''Eke raşta çareserî wazenê ganî cade şertê Rayber Apoyî bêrê bedilnayene. Ganî tecrîd bêro wedaritene. Ganî azadîya fîzîkîye û asayîşê Rayber Apoyî berê caardene û şertê weşîye bêrê pêardene ke o zî bieşko prosesî rayra bero. Têgêrayîşê Azadîye zî Rayber Apo zî nê prosesî raşt waneno, wazeno wayûbiratîya şaran  û demokratîkbîyayîşê Tirkîya aver bêro.

Seba ke Rayber Apo bieşko rolê xo kay bikero ganî şertê bêrê afernayene. Xerîtayêka rayîrî ya Rayber Apyî est a, palnê ci est a, pê xo bawer o. Nika ganî îqtîdar û partîyê sîyasî yê bînî verê çareserî abikerê. Waro sîvîl, rêxistinê cinîyan pêro komel eşkeno nê prosesî de rolo pozîtîf bigîro. Zemînê nê zî est o. Her çîya ver çend mengî yo muaqeşeyî yenê kerdene, heme rojdemî dormeyê nê muaqeşeyen de şekil genê. No muhîm o la tay wazenê ke nê rojdemî eslê ci ra raqilnê ganî musade nêro dayene. Ganî vera nê têkoşîno xurt bêro kerdene.''

Sozdare Avesta vist vîrî ke Erdoganî prosesê 2015î kerd qurbanê îqtîdarê xo û vat, ''Erdogan narey zî semedê menfeatê xo kesanê bînan erzenê vernî û dirîtîye keno.'' Avesta ard ziwan ke bitaybetî Erdogan û AKP ziwanê tehdît û şantaşî şuxulnenê  û vat,'' Eke wazenê mesela çareser bikerê ganî game bierzê, dahîna giran bibê nizî. Wa pê tehdît şantajî merê. Şarê kurdî nê rê mird o.  Xora 40 serrî yo dewlete nê ziwanî şuxulnena. Feydeyê nê tehdîtan çewî rê çîn o.''

Sozdare Avest bale ante ser ke hetêkî ra munaqeşeyê çareserîya meseleya kurdan yenê rayraberdene û hetê bînî ra vera Rojawanî hêrişê girdî yenê kerdene û vat, '' Sey têgêrayîş û şarê kurdî se beno wa bibo ma do çirey têkoşînî cameverdê.'' Sozdare Avesta veng da şarê kurdî yê leteyanê bînan ê Kurdîstanî û Ewropa ke wa paştî bidê xoverdayîşê Rojawanî û vat, ''Bitaybetî xoverdayîşo ke Awbendê Tişrînî de yeno rayraberdene zaf muhîm o. Ganî xoverdayîşê Rojawanî dahîna zaf bêro wayîrvejîyayene. Ganî her kes nê prosesî de rolê xo kay bikero û cinî û ciwanî nê prosesî rê serkêşîye bikerê.''