Endama Konseya Hemserekîya Pêroyî ya KCKyî Zilare Stêrk vat: ''Ganî bingeyê dîyalogê bi Rayber Apoyî awan bibo.'' Zilare venga her kesî da ke wa goş nêdo xeberanê spekulatîfan û wa bala her kesî eşkerayîyanê têgêrayîşî ser de bibo.
Endama Konseya Hemserekîya Pêroyî ya KCKyî Zilare Stêrk bernameyêkê taybetî yê Medya-Haber TVyî de rojdem ercna.
Qiseykerdişê Zilare Stêrk ra tayê noqtayê girîngî wina yê:
''Ez Komployê Mîyanneteweyîyî şermezar kena. Komployî 26 serrî xo pey de verdayî. Nê 26 serran de Rayber Apoyî Îmrali de têkoşînêko bêhempa kerd. Bi na wesîle ez Rayber Apoyî û têkoşînê ey ê bêhempayî selam kena. Komployê 9ê Teşrîna Verêne çinkerdişê Rayber Apoyî armanc kerdêne. La Rayber Apo bi eqlî têgêra û no armanc pûç kerd. Dima o bi Komployê 15ê Sibate ame esîrkerdene û teslîmê Tirkîya ame kerdene.
La Rayber Apoyî Îmrali de zî şoreşêkê mezgî yo pîl kerd. Ey şert û mercê Îmraliyî vurnayî kerdî warê awankerdişê paradîgmaya xo. Ewro fikr û paradîgmaya Rayber Apoyî dinya ra vila benê. Şorişê Rojawanî bingeyê paradîgmaya Rayber Apoyî de ronîya.
Ma eşkenê vajê ke komplo ameyo pûçkerdene la komplogerî nêqedîyayê. Heta ke azadîya Rayber Apoyî bîyarê ca têkoşînê ma yê vera komplogeran do dewam bikero. Şarê ma zî bi qerardarî azadîya Rayber Apoyî wazeno. Xora 13ê teşrîna verêne de Amed de no ame mojnayene. Ganî rejîmo faşîst mesajê Amedî hol fam bikero.
Bahçelîyê faşîstî qiseykerdişêkê xo de venga Îmraliyî da. Berê Îmraliyî girewte yê. O çax çira şima venga ci danê? Bahçelî vano ke wa Rayber Apo PKKyî tasfîye bikero. La şarê ma mesajê xo bi zelalî da. Şima berê Îmraliyî abikerê, bingeyê pêvînayîş û dîyaloganê bi Rayber Apoyî awan bikerê.
Xeberê spekulatîfî weşanîyenê. Nika zaf nîqaşî yenê kerdene. Raştîyî ney ê; Îmrali de tecrîd est o, Herêmanê Pawitişî yê Medya de şer û xoverdayîşêko çetin est o, gonîye rijîyena.. Eke şima raşta zî zerrî ra vengdayîşê xo kenê hêverî nînan vindarnê.
Ganî şarê ma, dostê ma û her kes goş nêdê spekulasyonan. Wa goşê şarê ma û dostanê ma, qiseyê ma ser de bibo. Têgêrayîşê azadîye prosesî nêzdî ra teqîb kno.
Ez embaze Bêrîtane serrgêra şehadetê aye de yad kena. Fermandare Bêrîtane bingeyê artêşbîyayîşê cinîyan awan kerd. Aye bi çalakîya xo ya fedayîye hêz û îradeyê cinîyan eşkera kerd. Aye musna cinîyan ke wa xo bipawê. Şorişê Cinîyan xeta şehîdanê ma yê sey Bêrîtane de do ser bikewo. Ewro dewleta tirke û îqtîdarê ci bi giranî hêrişê cinîyan kenê. Vera cinîyan ê kurdan polîtîkayê şerê taybetî yenê caardene. Ganî cinîyî vera nê kerdişan têkoşînê xo yê rêxistinkerdeyî aver berê û yew bibê.''
