Endama Konseyê Serekîye yê KCKyî Zilar Stêrke beşdarê programê Rojeva Jinî yê Stêrk TVyî bîye û rojeve ser o qisey kerde.

Stêrke va ‘Bi Komploya Mîyanneteweyî Rayberê Şarê Kurdî Abdullah Ocalan Rojhelato Mîyanên ra ame vetene û 20 serrî nê vejîyayîşî ser ro derbaz bîyî’ û wina dewam kerde: “Dewleta tirk û hêzê mîyanneteweyî vatî qey ê bi esîrgirewtişê Ocalanî eşkenî Tevgerê Azadîya Kurdî biqedênî. Tevgerê Azadîye nê hesaban veng vet û heme cayanê dinya de xo rê dostî dîyî.”

Stêrke qiseykerdişê xo de bale ante kampanyaya îmzeyan ya ‘Ocalan rê Azadîye’ ke hetê Konfederasyonê Yewîya Sendîkayan (TUC) ra yena viraştene ser û wina va: “Tevgerê Azadîya Kurdistanî destek, piştîdayîşyewbînan û dostî ke seba azadîya Ocalanî bêrî dayene do xo vîra nêkero.”

ÎRAN NÊŞÊNO WINA ÇARESER BIKERO

Stêrke dewamê qiseykerdişê qala kombîyayîşo ke Rûsya, Îran û Tirkîya beşdar bîybî, kerde û wina va: “Kombîyayîş ra dima Îranî 3 hepsîyê sîyasîyî îdam kerdî û Başûr de hêrişê 2 partîyan kerd. Nêyî Tirkîya ra qerfîyaye nîyî. Îran bi îdam û kerdişanê antîdemokratîkan nêşêno krîzê kulturî, ekonomîke û sîyasîyan çareser bikero. Şarê ke Îran de cuyenî, êdî tehamulê nê kerdişanê antîdemokratîkan nêkenî.”

AMERÎKAYE KENÎ MEHNE

Stêrke va ‘Tirkîya û Îran Amerîkaye kenî mehne û krîzê xo yê sîyasî û ekonomîke manîpule kenî’ û wina domnaye: “Her dîyan de çîyo esasî o yo ke nêşênî problemanê komelê xo çareser bikerî. Tirkîya heme çimeyanê xo seba çinkerdişê kurdan bikar kena. Tirkîya bi pereyê şarî sîyasetê şerî domneno. Ganî Tirkîya bizano ke heta ke problemê kurdî çareser nêkero û Rayber Apoyî reyde pêvînayîşan nêkero, nêşêna ekonomîya xo raşt bikera. Ganî tena kurdî nê, heme şarê ke Tirkîya de cuyenî, vera polîtîkayanê zuran yê AKPyî de bivinderî.”

WA CINÎYÎ RAYBERÎYE BIKERÎ

Zilar Stêrke peynîya qiseykerdişê xo de va ‘krîzê ekonomîke ra tewr zaf cinî û domanî tesîr benî’ û qiseykerdişê xo wina qedênaye: “Ganî tewr zaf cinîyî vera polîtîkayanê qirkerdişî ke şarê kurd û cografyaya kurdan de yenî domnayene de bivinderî. Cinîyê ke ekonomîye xelq kenî, ganî komel de zî rayberîye bikerî û vera faşîzmî de bivinderî.”