Rêxistina HDPyî ya Amedî destbendkerdişê hemşaredaranê Sûrî  Fîlîze Buluttekîn û Cemal Ozmdemîrî û xespkerdişê Şaredarîya Sûrî protesto kerd.

Hemserekanê HDPyî yê Amedî Hulya Alokmen Uyanik û Zeyyat Ceylan, îdarekarê partîye û hemwelatijanê ke waştê verê şaredarîye de eşkerayîyêk bide polîsan destûr înan nêda. Eşkerayîye Tekkapi de ameye viraştene. Bi nameyê HDPyî hemserek Ceylanî qisey kerd. Ceylanî vist vîrî ke ê vîjnayîşê 31ê adare de ser kewtî û vat îqtîdaro ke bin kewt wazeno ke bi qeyûmî waştişanê xo bifîno dest. Ceylanî bale ante polîtîkaya hêrişkare ya vera HDPyî ser û vat:‘‘ Îqtîdar se keno wa bikero ma do çirey verê faşîzmê înan de milê xo çewt nêkerê. Senî ke ma verî zî qeyûm tîya ra şawitî ma do reyna qeyûman bierzê teber. Hemsereke Uyanike zî vat: ‘‘ Ma sey HDP û şarê Sûrî verê polîtîkaya qeyûmî de çok nêdanê, do medê. Ma semedê haştîyê şaran têgêrenê. Têkoşînê ma do dewam bikero. Ma do çirey peyser game meerzê.‘‘