Şirnex de tacîzê çawişê pisporî ame protestokerdene. Wekîla DEM Partî Newroze Uysal Aslan da zanayene ke serebûtî ra dima faîl wedarîyayo nêweşxaneyî û uca de hetê polîsan ra ameyo remnayene.
Şirnex de tacîzê çawişê pisporî bi rayraşîyayîşêkî ame protestokerdene. Endam û îdarekarê KESKî, DBP, ÎHD, TJA, Mayê Haştîye û Wekîla DEM Partî Newroze Uysal Aslan zî tewrê rayraşîyayîşî bîyî.
Rayraşîyayîş de pankarta ''Îstîsmar û tacîzî rê bes o'' ameye akerdene û sloganî ameyî vatene. Girseyî verê bînaya KESKî de eşkerayîyêke daye.
Endamê KESKî Murat Ozbeyî eşkerayîye de qisey kerd û pare kerd ke cinîya ke çawişê pisporî tacîzê ci kerdêne hetê şarî ra ameya xelisnayene. Ozbeyî vat: ''Netîceya mudaxeleyê şarê ma de faîlo tacîzkar Z.Ç. birîndar bi. Serebûtê winasênî verê cû zî qewimîyayî. Sebebê nînan polîtîkaya bêcezaverdayîşî ya. Ma hema nêdî ke nê faîlê unîformakerdeyî ameyê cezakerdene.
Walîtîye xora bi eşkerayîya xo xîret kerd ke faîl bipawo. Walîtîya qalê faîlî de çîyêk nêvat la 4 kesê ke mudaxeleyê faîlî kerd ameyê detbendkerdene. Ma venga meqamanê edlî û îdarîyan danê ke faîlî ceza bikerê.''
Wekîla DEM Partî Newroze Uysal zî ard ziwan ke faîl hetê polîsan ra ameyo remnayene û pawitene. Newroze vat: ''Hêzê asayîşî xîret kenê ke mîyanê şarê ma de madeyanê tîryakî vila bikerê û ajanîye aver berê. Serebûtê Fîrdevse Babat û Sakîne Kultur hema zî vîrê ma de yê. Şarê Şirnexî vera nê serebûtî payan ser de yo.''
Eşkerayîye bi slogananê sey “Jin, jiyan, azadî” û “Bêdeng nemîne nexwe dê dor bê te” qedîyaye.
