Heyetê Herêmî yê Pawitişê Berhemanê Kulturî yê Wezaretê Kulturî û Turîzmî yê Tirkîya 14ê sibata 2018î de bernameyê îmarî vurna. Odaya mîmaran dewa akerde ke xebitnayîşê kerrayanê bazaltî do bêro batalkerdene ke vera tarîx û mîmarîya Sûrî yê.

Mehkeme bira daye ke ê eşkenê goreyê raporê pisporan têbigêrê û waşt raporêk bêro amadekerdene. Di akademîsyananê Zanîngehê Dîcle û di pisporan 20ê adare de Sûr de ke keyeyê neweyî yenê viraştene keşfêk kerd. Rapor 17ê gulane de pêşkêşê mehkeme ame kerdene. Rapor de ame vatene ke eleqayê nê keyeyan bi tarîxê Amedî çin ê. Raporê pisporan ra dima ganî viraştişê keyeyan bêro vindertene la mehkeme waşt ke raporêko bîn bêro amadekerdene. Avûkata Odaya Mîmaran Gulşene Ozbek îfade kerd ke bira mehkeme vera huqûqî ya û ganî bire goreyê raporî bêra dayene. Ozbeke vat ke çeleyê 2020î de ê do reyna Sûr de keşfêk bikerê.