Hêzanê dewleya tirke wextê peyênî de qezaya Geverî ya Colemêrgî û zaf cayan de hêrişê goranê gerîlayan kerd. Vera nê hêrişan nêrazîbîyayîşî dewam kenê.Hemsereka Kongreya Komelê Demokratîkî (KCD) Leyla Guven derheqê hêrişanê vera cenazayan û armancê dewleta tirke yê pê nê herişan de ANFyî rê qisey kerd.

Qiseykerdişê Leyla Guven ra beşêk wina yo: 

''Nika Kurdîstan de vera goristanan polîtîkayê barbarî yenê kerdene. Definkerdişê mergan û girewtişê şînî têna rewşêka huqûqî nê heman wextî de rewşêka exlaqî û wijdanî ya. Nê hêrişî serranê 90an anê çew vîrî. No metodê hêrişî ê serran de ameyêne xebitnayene. La dayîkanê kurdan tim pê tewirêkê serewedarteyî no konsetp pûç kerd. Pê nê hêrişan yeno waştene ke şarê kurdî rê mesajêk bêro erşawitene labelê şarê kurdî rixmê nê kerdişan zî qet têkoşînê xo ra fek vera nêda. Astengkerdişê girewtişê şînî komel de travmayêke virazeno. Dewlete xora wazena naye bikera. La çîyêk hesab nêkena. Nê têgêrayîşê ci komel de vurîyeno hêrsî û no hêrs beno pîlêr. Cergê DAÎŞî zî îşkenceyê cenazayan û hêrişê goristanan kenê. Seba na hîşmendîye girîng nîya ke menga Remezanî ya yan nê. La goreyê Îslamî gorî erjê merdimîye yê. 

Dayîke Hakîfe Çewlîgî ra vat 'Eke hewce bibo ez verê gorê kênaya xo de nobete gêna', no vatiş dejê înan mojneno. Dewlete wazena vaja ziwan, nasname û kulturê xo ra fek vera bidê.  La ma bi taybetî dayîkê kurdî bi serran o ke vera na hîşmendîye têkoşîn kenê. Ma pê vatişê Seyîd Rizayî cewabê nê kerdişan bidê; Eyb o, şerm o zulm o.

Ê wazenê ke hêvîya haştîye çin bikerê. Ê nêeşkenê pê na polîtîkayan netîce bigêrê.  Êyê ke nê polîtîkayî anê ca wa ganî bizanê ke tarîxî qet êyê ke şarî rê zulm kerdo efû nêkerdî. Dadîyê ke verê goranê domananê xo de nobete gênê axê înan do milê AKP-MHPyî de bibo.''