7ê tebaxa 2019î ra nata Rayberê Şarê Kurdî Abdullah Ocalan reyde pêvînayîş nêno kerdene. Hemserekê Komeleya Şûbeyê Amedî yê Huqûqnasanê Seba Azadîye (OHD) Muharrem Şahînî derheqê tecrîdê Ocalanî de ANFyî reyde qisey kerd.

Şahînî vat: "Derheqê pêvînayîşanê tepişteyan de qanûnî eşkera yê. No çîyêko winasên nîyo ke bi keyfîyet û şiroveyan bêro wedaritene. Huqûq de no zelal o û çarçewa ci ame kifşkerdene.Tecrîdê Birêz Ocalanî heta ewro mîsalê ci nêameyî dîyene. Têna giravêke de yeno tepiştene. Eslê xo de wexto ke Birêz Ocalanî avûkatan û keyeyê xo reyde pêvînayîşî kerdêne zî tecrîd dewam kerdêne. Hem cayo ke keye ra zaf dûrî bi hem zî pêvînayîşê bi avûkatan ganî hewteyêk de rayêk bi la bi nizamî nêameyêne kerdene. Nê meseleyî nêameyî çareserkerdene. Temmuza 2011î ra heta bi serran nêverda ke Birêz Ocalan avûkatanê xo reyde pêvînayîş biko. Peynî de netîceyê grevanê vêşanîye de pêvînayîşî ameyî kerdene. Dima reyna nê pêvînayîşî ameyî astengkkerdene.

Wexto ke Ocalanî reyde pêvînayîş yeno kerdene komel reseno aramîyêke, komel de tansîyonêkê baş xo mojneno. Nêzdîbîyayîşê Birêz Ocalanî yê bi meseleyanê komelî û seba çareserkerdişê nê meseleyan têgêrayîşê ey komel de rehetîyêk az keno. Coka têna pêvînayîşê bi avûkatan zî kenê ke rayaumûmîye nefes bigêra. Coka no tecrîd tim dewam kerd. Tecrîdê Ocalanî sîstematîk o. Ge ge ame girankerdene, ge ge prosesê çareserîye de bi hawayêkê perîyodîkî keyeyan û avûkatan reyde pêvînayîşî ameyî kerdene. Beno ke merdim nêwazeno seba tay kesan çîyêk biko. La qanûn û huqûqî seba her kesî yê. Merdim naçare yo ke goreyê înan têbigêro. Hemwelatîyêk, selahîyetdarêk û sîyasetmedarêk mecburê ke goreyê înan nêzdîbîyayîşê xo awan bikê.

Ge ge îqtîdaran seba dewamkerdişê hukmê xo tecrîd xebitna.Eke rewşe û şert û mercî normal bibê menfaatê komelêkê qijkekî zerar bivînê. Seba ke menfaatanê xo zî bipawê nêwazenê welat rehet bibo. Naye ra nêwazenê vajê, 'Wa Ocalan qisey nêko, bêveng bo. Wa kesêk reyde têkilîye nêko. Ma zî mîyanê nê kaosî de heta ke ma eşkenê ma bibê û îqtîdarê ma dewam biko.' Îzahê ney o asan û zelal bi nê hawayî yo. Ez wina nêfikirîyena ke tecrîd têna karê Tirkîya yo. Tepiştişê Ocalanî de senî ke parê hêz û rêxistinanê bînan estê zî dewamkerdişê tecrîdî de zî koalîsyon yan zî fikrêko hempar esto. Helbet tarzê xebate yê CPTyî heta rewşa tecrîde nêameye meydan rojdemê Tirkîya de çinêbî. CPT şi Îmrali, Ocalanî reyde pêvînayîşî kerdî. La nika ê kamyew merhele de yê ma nêzanenê. Seba ke keye û avûkatanê ci Birêz Ocalanî reyde pêvînayîşan bikê CPT zêde çi nêkeno."