Serekê ÎHDyî yê Şûbeyê Wanî Mûrat Meletî tecrîd sey sûcê merdimîye hesibna û va ‘îqtîdar û hêzanê mîyanneteweyîyan pîya qerarê tecrîdî girewto.’

FELSEFEYA OCALANÎ RA TERSENÊ

Serekê Komela Heqanê Merdiman ya (IHD) Şûbeyê Wanî Mûrat Meletî vist vîr ke tecrîd Rayberê Şarê Kurdî Abdullah Ocalanî ser o bi xorîbîyayîşî dewam keno û wina va: “Tecrîd na rey zaf cîya yo. Mîyanê tecrîdî de tecrîd esto. Xeylê wext o ke dîyayîşî nêvirazîyenî. Verê cû mehneyê OHALî estbi. Na rey zî cezaya disîplînî mehne kenê. La ma hol zanê ke raştî de nêyî sebeb nîyê. Waştişê înan Brez Ocalanî şarî ra raqilnayîş o. Rojhelato Mîyanên newe ra yena ronayene, fikrê neweyî lazim î. Coka bi qedexekerdişê dîyayîşî wazenê vernîya felsefeya Ocalanî bigirê."

WAŞTIŞÊ TECRÎDÎ WAŞTIŞÊ ŞERÎ YO

Meletî qiseykerdişê xo wina domna: "Tecrîd suce merdimîye yo û rixmê heme reaksîyonan hema yeno domnayene. Wextê muzekereyanê aştî de Birez Ocalanî gamê muhîmî eştî û ramojna ke aştî mumkun a. La dewlete herinda aştîye de şer waşte û tecrîd giran kerde. Tecrîd, waştişê şerî yo. No kaoso ke Tirkîya tede yo, tena Ocalan eşkeno înan na tengayîye ra vejo."

GANÎ CPT WEZÎFEYÊ XO BÎYARO CA

Meletî ard ziwan ke o sey pawitoxê heganê merdiman tim hetê aştî de yo û wina va: “Ma hol zanê ke qet şerêk Tirkiya û Rojhelatê Mîyanênî rê demokrasî nêano. Seba aştî ganî helêk cuwa ver tecrîdo ke Birez Oclanî ser o esto, wedarîyo. Xora bêvengîya CPTyî nîna qebul kerdene. Ganî dezgehê heqanê merdiman û selahîyetdarî yê Ewropa wezîfeyê xo bîyarî ca û seba wedartişê tecrîdî têbigerî.”