Hemserekê KODARî Fuat Bêrîtanî derheqê rewşa Îran û Rojhelatê Kurdîstanî, serewedaritiş û tecrîdê vera Rayberê Şarê Kurdî Abdullah Ocalanî de ANFyî rê qisey kerd. 

Qiseykerdişê Fuad Bêrîtanî ra tay noqtayê girîngî wina yê:

''Şorişê 'Jin, Jiyan, Azadî' pêro Îran û dinya ra vila bi. Îran de zulm, teda, hêriş û şîdetê rejîmê Îranî zêdîyenê. La nêrazîbîyayîşê şaranê Îran û Rojhelatê Kurdîstanî û waştişê înan ê demokrasî bîyî destpêkê safhayêka newîye ya xoverdayîş û têkoşînê dewrê neweyî. Girîng o ke na safha de cepheyêkê demokrasî bêro ronayene. Nika dewleta tirke zî xîret kena ke tay qelsîyanê şarî ra îstîfade bikera û xo bikera mîyanê şerî. 

Nika serkêşîya cinî û ciwanan de kuçeyê Îranî de her roje çalakîyî yenê kerdene. Eke rejîmê Îranî nika gooş nêdo nînan ser siba do seba ney îmkanî nêvîno. Rejîmê Îranî ancax eşkeno bi demokrasî û çareserkerdişê meseleya kurdan û meseleyanê bînan nê krîzî ra xo bixelisno. Ganî Komara Îslamî ya Îranî hol bizano ke sîyasetê dardekerdişî, tepiştiş û hêrişê vera çalakîkeran qet nêeşkenê ey bixelisnê.

Nika verê sîstem û îqtîdarê Îranî de di rayîrî est ê; ya do şer bikero yan zî do bivurîyo. Heta nika rejîmî kerdişanê xo yê şîdetî û teda ra qet yew netîce nêgirewte. Ewro şarê kurdî bîyo serkêşê serewedaritişî. Senî ke meseleya kurdan bena sebebê krîzanê Rojhelatê Mîyanênî çareserîya ci zî do biba sebebê çareserîya krîzan. Şarê kurdî û şarê bînî yê Îranî demokrasî weçînenê. Sîstem û modelê Rojawanê Kurdîstanî mojnenê ma ke kurdî terefgîrê krîzan û cîyatîye nîyê. Kurdî çareserîya demokrasî û raştîyan de isrardar ê.

Rejîmê Îranî ganî xo sîyasetê teda, destsernayîş, dardekerdiş, îşkence, qedexekerdiş, tersnayîş û remnayîşî ra dûrî bigêro. Ma sey KODARî verî projeyê xo yê seba demokratîkbîyayîşî pêşkêş kerdbi. Projeyê ma serê bingeyê rêxistinkerdiş û azadîya şaran de yo. KODAR ne reşw nikayêne ya komelkî û îqtîdarî qebul keno ne zî keweno cayê hêzanê teberî. Ma demokratîkbîyayîş û hemparîya şaranê Îranî metodê tewr exlaqî û sîyasî vînenê. Tek rayîrê azadîye û têdûştîye têkoşînê şaran o hempar o. Bi nê têkoşînî krîzî do çareser bibê.

Nê prosesî de sîstemê tecrîd û îşkenceyî yê vera Rayber Apoyî qetî nêno qebulkerdene. Tek waştişê şarê kurdî û sîyasetî wina yo ke wa tecrîd bêro wedaritene. Ganî pêro hemwelatîyî seba azadîya Rayber Apoyî têbigêrê. Şorişê 'jin, jiyan, azadî' yo ke pêro dinya paştî dana ci berhemê Rayber Apoyî yo.  Ganî çarçewa Hemleya Wextê Azadîye de serewedaritiş û nêrazîbîyayîşê vera tecrîdî bizêdîyê.''