Endama Konseya Serekîye ya KCKyî Elîfe Ronahî bîye meymana bernameyêkê Radyoyê Dengê Welat û grevê vêşanîye yê tepişteyan ercna.

Qiseykerdişê Elîfe Ronahî ra beşêk wina yo:
''Ez verî Komployê 15ê Sibate şermezar kena û şehîdanê şîarê 'Şima nêeşkenê tîja ma tarî bikerê' bi rêzdarî yad kena. Destpêkerdişê Komployî ra nata zîndanî her tim xo ver danê. Tepişteyî nika zî vera tecrîdkerdişê Rayberîye bi Hemleya 'Wext wextê ci yo' xo ver danê. Ez înan rê selam kena.

Grevê vêşanîye yê 2018î de dewlete neçare mende ke seba pêvînayîşê bi Rayberîye destûr bida. O çax zî Rayberê ma seba qedînayîşê grevî veng dabi. Nika dewleta tirke hêrişê pêro parçeyanê Kurdîstanî kena. Dewlete xîret kena ke têkilîya Rayberîye û teberî bibirna. Ma zanenê ke Îmrali de Rayberê ma rê tedayê giranî yenê kerdene.

Eke tecrîd nêqedo û Rayberê ma azad nêbo no faşîzm têna kurdan rê nê pêro dinya ra do gef biwano. Embazê ma yê zîndanan, kurdî, cinîyê kurdî zanenê ke eke Rayberê ma azad bibo faşîzm do biqedo û rewşa nikayêne do bivurîya. Ez pê bawer a ke no têkoşîn teqez do ser bikewo. Hem Rayberê ma hem zî embazê ma yê tepişteyî do pêvînayîşanê tarîxîyan bikerê.

Embazê tepişteyî çarçewa 'Wext wextê azadîye yo' de xo ver danê û mesuldarîya xo ya seba azadîya Rayberîye anê ca. Ganî kurdî wayîrê xoverdayîşê zîndanan vejîyê. Pê vatişê 'AKP-MHP qel bîyê, hê rijîyenê' faşîzm nêqedîyeno. Faşîzm pê têkoşînî qedîyeno.

Bi taybetî kurdî ganî hêzê demokratîkî yew bibê û nê firsendî bişuxilnê. Ma zanenê ke dişmen vera hêriş keno, nêverdano ke ma nefes zî bigêrê. Labelê wexto ke nê têkoşînî dest pêkerd qasê serê derzine zî îmkanêk çinbi. Nika şert û mercî estê ke ma bişuxilnê. Kurdî heta ke bi hawayêkê rêxistinbîyayeyî têkoşîn bikerê do ser bikewê.''