Seba qedîyayîşê tecrîdkerdişê Rayberê Şarê Kurdî Abdullah Ocalanî, grevê vêşanîye û rojeyê mergî dewam kenê. Yew xoverdayoxê grevê vêşanîye zî Mesût Yaşasin o ke zîndanê Xarpêtî de yo.

Mesût Yaşasino ke gama Unîversîteya Dîcle de serra 2017 de wendêne ame tepiştene û ame şirawitene Zîndanê Amedî yê Tîpê D’yî, netîceyê muhakemekerdişî de bi îdîaya ‘endamîya organîzasyonî’ ame tepiştene. Yaşasin dimayo ke 4 mengan Zîndanê Amedî yê Tîpê D’yî de mend, Zîndanê Xarpêtî rê ame sewqkerdene. Yaşasin û embazê xo yê ke dest bi grevê vêşanîye kerdî, 1’ê Adare ra nata hucreya yewkesîye de odayêk de yenê girewtene.

‘Problemê Vînayîş û Şinawitişî Peyda Bîyê’

Pîyê Mesût Yaşasinî Mahsûm Yaşasinî Çarşemeyê ravêrteyî de lajê xo dir pêvînayîşêk kerd. Yaşasinî da zanayene ke halê lajê ê xirab bîyo. Yaşasinî vat problemê vînayîş û şinawitişî lajê ê de virazîyayê, la lajê ci rixmê problemanê weşîye de hucre de çalakîya xo domneno.

‘Hucreya Yewodaye de Çalakîya Xo Domneno’

Pî Yaşasinî bale ante ke ê îdareyê zîndanî rê razînêbîyayîşê xo ardo ziwan ke çira lajê ci û hemrayê ê yê ke grev de yê erzîyayê hucreya yewkesîye û seba no hal biqedîyo selahîyetdaranê zîndanî dir ameyo têhet. Yaşasinî vat selahîyetdaran goş nêdayo waştişê ê û vat, lajê ê wextê destpêkê grevê vêşanîye ra hucreya yewkesîye de yo.

‘Waştişê Ma Bêfayde yê’

Yaşasinî da zanayene seba ke lajê ê waştişnameyêk îdareyê zîndanî rê binûso qelem û kaxidêk waşto, îdareyê zîndanî vato, “Waştişnameyê şima tîya bêqîmet o.” Pîyî vat ke no tewir bêhuqûqîyêk a.

‘Waştişê Înan O yo ke Dewlete Huqûqê Xo Bica Bîyaro’

Yaşasinî vat, waştişê lajê ê waştişê meşrû û yê merdimane yê û waşt ke paştî bidîyo çalakîyanê grevê vêşanîye û rojeyê mergî. Pî Yaşasinî vat, “Ez paştî dana waştişanê lajê xo û hemrayanê ê. Waştişê înan ê pêvînayîşê Rayberê Şarê Kurdî Abdullah Ocalanî bi avûkatan û keyeyê xo dir eşkeno bêro bicaardene. Rasta ci, ê wazenê ke dewlete huqûqê xo bica bîyaro. Tecrîd sûcêkê merdimîye yo. Ma do heta peynî tepişteyanê ke waştişê înan o tekane wedartişê tecrîdî yo dir bê. Ma tecrîdê serê Rayberê Şarê Kurdî Abdullah Ocalanî şermezar kenê û wazenê ke tecrîd tavilî bêro wedartene.”