Tepişteyo nêweş Mehmet Emîn Ozkan (83) 17, 18, 19, 20 û 24ê gulane de semedo ke rewşa ci giran a Zîndanê Amedî ra wedarîya Nêweşxaneyê Perwerde û Cigêrayîşî yê Gazî Yaşargîlî. Ozkano ke nêeşkayêne rayîrî ra şoro 25ê gulane de reya 6. bi hawayêkê kelemçekerdeyî wedarîya nêweşxaneyî. Ozkan 3 rojî nêweşxane de cilê rakewtişî rê ame kelemçekerdene.

Lajê Ozkanî Vedat Ozkanî îfade kerd ke babîyê ey vizêr bi hawayêkê kelemçekerdeyî  şewe pê wesayîtê rîngî ame berdene bi Zîndanê Amedî.

Kênaya Ozkanî Selma Ozkan ard ziwan ke pê bahaneya ke wextê tedawî qedîyayo babîyê ci erşawîya zîndanî. Selma vat: ''Babîyê mi reyna pê kelemçeyî û sandalyaya tekerlekine de erşawîya zîndanî. Rewşa babîyê mi giran a. Ma do derheqê rewşa ey de avûkatan reyde qisey bikerê.''