Zîndanê Amedî de tepişteyo nêweşê kanserî Necmettîn Ayan (60) pê vîrusê Korona kewt. Ayan Nêweşxaneyê Cigêrayîş û Perwerdeyî yê Gazî Yaşargîlî de 6 rojan ra nata tedawî vîneno.  

Kênaya Ayanî Derya Ayan da zanayene ke babîyê ci hem kanser o hem zî tede nêweşîyê şeker, tansîyon, pişike, tengîya nefesî estê. Derya Ayan eşkera kerd ke zîndan de tedbîrê hîjyenî nêgêrîyenê û weşîyê tepişteyan binê rîskî de yê. Derya Ayan ard ziwan ke koxûşê 8 kesan de 18 kesî pîya manenê.

Derya Ayan vat: ''Nêweşîyê babîyê  mi xeylêk ê. Nika zî pê vîrusê Korona kewt. Zîndan de kapasîteya ci ra zêdêr kesî heman koxûş de manenê. Bi nê hawayî vîrus xora beno vila.''