Çimdarîyanê sîyasîyan ê Kerkûkî derheqê alozî û meseleya Zînî Wertê û tesîrê xirabî yê ney ê seba menfaatanê neteweyîyan de qisey kerd.

Sîyasetmedar û çimdarê sîyasî Mihemed Nesredînî derheqê rewşa nakokîyanê Zînî Wertê de vat: ''Eşkera yo ke eleqeyê menfaatanê şarê kurdî pê alozîya Zînî Wertê çin o. Dewleta tirke çim verda Zînî Wertê, wazena ke nê qezayan îşxal bikera û hêrişê gerîlayanê PKKyî bikera. Goreyê mi na alozîya ke semedê plananê dewleta tirke ra qewimîyena bena ke mabênê kurdan de biba sebebê şerê wayûbirayî. No şer têna do vera menfaatanê şarê kurdî bibo ganî verê nê planî bêro girewtene.''

Çimdarê sîyasî û rojnamger Burhan Haci Silêmanî derheqê heman babete de vat: ''Alozîya Zînî Wertê pê cakerdişê hêzanê PDKyî dest pêkerd. PDKyî vat ke înan seba vergirewtişê vîrusî hêzê xo erşawitî. Na herême kontrolê PDKyî de nîya. Aseno ke PDK pê bire û plananê hêzanê teberî yê sey Tirkîya yan zî hezêkê bînî têgereno.'