Tulaye Hatimogullari ya ke serrgêra Qirkerdişê Terteleyê Dêrsimî de qisey kerd, vat, “Semedê pîya ciwîyayîşî ganî heqîqetî de bêro têrî û komîsyonê cipersayîşî bêro ronayene. ” Keskîn Bayindir zî vat, “Şarê Dêrsimî do vera nê qirkerdişî bêveng memano. ”
Bi wesîleya qirkerdişê ke 4ê gulana 1937 Dêrsim de dîya despêkerdene Meydanê Seyîd Rizayî de vîrardiş ame kerdene.
Hemserekê Pêroyî yê DBPyî Keskîn Bayindir, Hemsereka Pêroyî ya DEM Partî Tulaye Hatimogullari, Wekîla DEM Partî ya Dêrsimî Aytene Kordu, Hemşaredarê Dêrsimî Birsene Orhan û Cevdet Konak, îdarekarê DADî û dezgehanê bînan ê elewîyan ê Dêrsimî, pabesteyê Platformê Kede û Demokrasîyî yê Dêrsimî û temsîlkarê komelê sîvîlî û partîyanê sîyasîyan ê bajarî û xeylêk kesî tewrê ci bîyî.
Tulaye Hatimogullari kesê ke tertedele de ameyî qetilkerdine ardî vîrî û nê vatî: “Terteleyê Dêrsimî qirkerdişanê tewr pîlan ê vera elewîyan ra yew o. Koçgirî, Dêrsim, Siwas, Çorum, Gazî û hetê bînî yê sînorê Sûrîye de wayûbirayê ma yê elewîyî ameyî qetilkerdene. Elewîyî tim na herre de bi waştişê çînkerdişî yenê qetilkerdene. Semedê asîmîlekerdişê elewîyan her çî yeno kerdene.
No welat wextê ronayîşê xo ra ne elewîyan ne zî şaran û bawerîyanê bînan rê tehemul keno. Elewîyî ewro hema zî hedef de yê. Berê elewîyan yenê nîşankerdene. Îqtîdar semedê asîmîlekerdişê elewîyan bi metodanê cîya cîyayan xebatanê xo domneno. Bawerîya elewîyan besta Wezîrîya Kultur û Turîzmî ke na polîtîkaya vera elewîyan de merhaleya bîne ya.
Komelê elewîyan milê xo çewt nêkerd, do mekero. Elewîyan çirey peyser paye nêeşte, ewro ra tepîya zî do meerzî. Ma reyna vanê ke elewîyî bawerîya elewîtîye heqîqetê na cografya ya.
Seba ke na cografya de şar û bawerîyê cîya cîyayî pîya bieşkê biciwîyê ganî heqîqetî de bêro têrî û komîsyonê cipersayîşî bêrê ronayene. Senî ke Seyîd Rizayî çok nêda ma soz danê ke ma zî do çok medê û sey tornanê pîranê xo ma do têkoşînî bidomnê. Ma canê xo xo vîra nêkerdî, ma do çirey xo vîra mekerê.”
Keskîn Bayindir zî vat: “Dejê Dêrsimî çirey vîra nêşino. Dêrsim de binê her kerra û serê her dare de do tim Seyîd Riza bibo. 87 serrî yo ma vera zulm û qirkerdişî têkoşîn kenê. Şarê kurdî vera nê qirkerdişî têkoşîn keno.Heta ke cayê mezelanê Pîr Seyîd Riza û hemrayanê ci bêro eşkerakerdene, nameyê Dêrsimî sey fermî bêro qebulkerdene û vera nê terteleyî komîsyonê heqîqetî bêro ronayene têkoşînê ma do dewam bikero. Senî ke Seyîd Riza û hemrayanê ci 100 serrî milê xo çewt nêkerd, ewro zî şarê Dêrsimî do vera nê qirkerdişî bêveng memano.”
Hetkarê Hemserekanê Fedarasyonê Komeleyanê Elewîyan ê Dêrsimî Huseyîn Kuluyî zî vist vîrî ke dejê Dêrsimî roja ma de zî dewam kenê û vat vera hêrişan do têkoşînê înan dewam bikero.
