Parlamemterê DEPî yê verênî û Hemserekê HDPyî yê Êlihî Nîzamettîn Toguçî derheqê tecrîdkerdişê Rayberê Şarê Kurdî Abdullah Ocalanî, hêrişê vera şarê kurdî û Yewîya Neteweyîye de ANFyî reyde qisey kerd. Ercnayîşê Toguçî wina yê:

“Bi têkoşînê şarê kurdî û sîyasetmedarê kurdî ge ge hukmat game erzeno û verdeno ke keye û avûkatî pêvînayîş bikê. Redkerdişê zîyaretê keye û avûkatan mojneno ke tecrîd dewam keno. Zindanê Îmraliyî wayîrê statuyêka taybet o û uca de qanûnî nênê caardene. Ganî her roje pêvînayîşî bêrê kerdene û berê aramîye newe ra bêro akerdene. Rayîrê çareserîye Îmrali ra derbaz beno. Êyê ke çareserîye nêwazenê Birêz Ocalan tecrîd kenê."

"Hêzê mîyanneteweyî nêwazenê ke tecrîdkerdişê Birêz Ocalanî biqedo. Tirkîya de tecrîd bi sebebê krîzî. Tirkîya de seba çareserkerdişê mesela kurdan Ocalan kilîdê haştîye yo. Heta ke mesela kurdan çareser nêba çîyêk çareser nêbena."

"Dewlete bi hawayêkê plankerdeyî hêrişê şarê kurdan kena. Tirkîya 9ê teşrîna verêne de hêrişê Rojawanî kerd. Dewlete bi taybetî rojanê girîngan ê kurdan weçînena û hêrişê erjanê kurdan kena. Dewlete bi hawayêkê eşkera dişmenîya kurdan kena. Verê çimanê pêro merdiman de qirkerdişan kena."

"Mesela kurdan meselêka xorin a . Armancê dewleta tirke yo verên no yo ke nêverda ke kurdî bibê wayîrê statuyêke. Seba naye xîret kena, hêriş kena, verê dewletanê bînan de çok şina erdî ro û tewizan dana. Ma nê wextê referandûmê Başurê Kurdîstanî de zî dî. Seba naye xeyalê pêro şarê kurdî çinkerdişê îşxalan û yewîya neteweyîye yê. Şarê kurdî seba yewîya neteweyîye amade yo û bi nê ruhî vejîyeno meydanan. Ganî hînî meydanê sîyasî de yewîyêke aver şora û sîyasetê kurdan zî rolê xo kay bikero."