Dewa Roboskî ya qezaya Qilabanî ya Şirnexî de 28ê kanûna 2011î de 34 doman û ciwanê kurdî hetê F16anê dewleta tirke ra ameybî qetilkerdene. Rixmo ke 9 serrî derbaz bîyî dejê roboskîyîjan dewam keno.

Zekî Tosuno ke qirkerdiş de lajê xi Mehmet Alî Tosunî dinyaya xo bedilnabi derheqê prosesê huqûqî yê dosya de ANFyî rê qisey kerd.

Tosunî îfade kerd ke seba ke berpirsê baroyan dosya reyde eleqedar benê muracatê Mehkemeya Heqanê Merdiman a Ewropa (MHME)  nêame ercnayene. Tosunî pare kerd ke eke avûkatan dosyayê kêmî temam bikerdêne beno ke MHME birêka winasêne do nêbida.

Tosunî vat: ''Ma muracatê Neteweyan ê Yewbîyayeyan zî kerd. Seba heqê xo ma do muracatê her cayî bikerê. Avûkatê ma prosesêkê neweyî danê destpêkerdene la Serdozgerîya Komare ya Qilebanî dosyaya ma vindarnaye. Xora nika cigêrayîşê edaletî ra hêvîya ma nêmende. Eke Qirkerdişê Roboskî de edalet bêro caardene pêro neheqîyê vera kurdan do bêrê cezakerdene. Seba ke ma edalet waşt dewa nêmende ke derheqê ma de ameya akerdene. Derheqê mi de 4 dosyayî estê. Ê xîret kenê ke ma bêveng bikerê la ma do têkoşînê xo yê seba edaletî dewam bikerê.''