Cigêrayîşê edaletî yê keyeyanê Roboskî ke 34 domanê înan 28ê kanûna 2011î de hetê teyarayanê şerî yê dewleta tirke ra ameyî qetilkerdene, dewam keno. Dayîkan serrgêra qirkerdişî de dej û hêrsê xo ard ziwan.

Dayîka Muhammedî Heybet Encu vat: ''Heta ke ez weşbî ez do nê dejî biancê. Hînî semedê ma manaya cuye çîn a. Seke domanê ma ameyî qetilkerdene ra nata cuya ma de têna dej û çalakîyî estê. Nika huzur û şayîye ma ra dûr ê. Seba ke ez şîya gorê lajê xo ser derheqê mi de xeylêk dosyayî ameyî akerdene.''

Dayîka Nadîrî Azîme Alma zî nê vatî: ''Ewro heme kurdê ke wayîrê namûs û anorê xo vejîyenê erzîyenê zînadanan. Çi sûcê Leyla Guven esto? Ma zî zîndanan de yê. Seke domanê ma ameyî qetilkerdene û dinyaya ma bîye tarî. Domanê ma yê bînî zî nêeşkeayî tîya bicuwîyê, dewe ra vejîyayî. Ma zî tîya yê la nêciwîyenê. Ma do her tim rêça domananê xo ra şirê.''

Dayîka Şirvanî Leyla Encu zî wina qisey kerd: ''Ma her hewte şinê goristan û o dejî newe ra ciwîyêne. Nê 9 serran de ne kerdoxî ameyî tepiştene ne zî qetilkarî ameyî cezakerdene. Coka ma zafêr hêrs benê. Psîkolojîya ma xeripîyaya. Qirkerdişî ra dima cuya ma zî qedîya.''