Turkmen: Şar rejîmê tekmerdimî nêwazeno

Endamê Heyetê Rayberdişî yê HDPyî Emîralî Turkmenî dîyar kerd ke şarê Tirkîya hînî rejîmê tekmerdimî nêwazenê û ganî vera rejîmî şarî têkoşînî geş bikerê.

Hetkarê Hemserekîya Mesuldarîya Komîsyonê Karanê Weçînayîşî yê HDPyî Emîralî Turkmenî ANFyî rê qisey kerd.

Turkmenî ard ziwan ke armanco verên  ê Îtîfaqê Kede û Azadîye no yo ke vera rejîmê yewmerdimî têkoşînkerdiş o. Turkmenî pare kerd ke beşê komelî rewşa nikayêne ra razî nîyê û vat: ''Seba şirîkîya têkoşînî ya komara demokratîke ma xîret kenê. HDP partîyanê sîstemî ra cîyayp. Partîyê sîstemî xo sîyasetê temsîlkerdişî ser o awan kenê û seba xurtbîyayîşê faşîzmî xîret kenê. Ma zî rayîrê hîrêyînî pêşnîyaz kenê. Ma zanenê ke Tirkîya komelêko yekpare nîyo, zafpare yo. Ma rayîrê hîrêyîn ê ke Tirkîya de ma hêvî, hemkarîye, haştîye, demokrasî, kede û têkoşînî pîl bikerê.''

Turkmenî da zanayene ke şarî rejîmê yewmerdimî nêwazenê û vat: ''Goreyê ma ganî hînî rejîmê qesre bêro rijnayene. Ma xîret kenê ke xeta têkoşînî ya waranê demokrasî rêxistin bikerê û pêro renganê komelî mîyanê komare de awan bikerê. Şarî hînî rejîmê yewmerdimî nêwazenê. Waştişê komelî est ê. Seba ke ma waştişanê komelî rê bibê cewab têkoşîn kenê.

Vera HDPyî teda nê rojan de zêdîyena. HDP têgêrayîşêkê şarî yo. HDP cewabanê raştan dano prosesanê neweyan û xîret keno ke xo biresno çemanê pîlan. Ma nika amadekarîya gama diyîne kenê. Kurdîstan de ma kenê ke partîyanê kurdan de bibê yew. Ma wazenê têkoşînê şaran bi têkoşînê kedkar û bindestan bikerê yew û rayîrê xo rê dewam bikerê.''