Bado ke Suleman Soylu bi Wezîrê Karanê Zereyî Wan de îşkenceyî zêdîyayî û dewam kenê. Heme kuçeyê Wanî bi bahaneyê qedexeyê çalakîyan û aktîvîteyan binê ablûqaya polîsan de yê ke îşkenceyo psîkolîjîk yeno kerdene. Wan de her serre bi desan qewimîyayîşê îşkenceyî vejîyenê meydan. Hêzê JOH û POHî ke kuçeyê dewe û taxanê Wanî girewtî binê ablûqa îşkenceyo ke şarî rê kenê bi rayîyê medyaya sosyale ramojnenê la rixmê naye bi bêzayîye yenê xelatkerdene.

2018 de Westanê Wanî de dewijanê ke sungî ardêdayene ameyî destbendkerdene. POHî nînan rê îşkence kerd û medyaya sosyale de vila kerd. La rixmê gerreyê dewijan polîsê îşkencekerî nêameyî cezakerdene.

2019 de wextê çalakîyanê vera qeyûmî de Kuçeyê Sanatî yê Wanî de polîsan Firat Koço nêweşê şîzofrenî pê cop, kask û paskulan kişt. Herinda polîsan de Koçî rê dewa ameye akerdene.

Tewr peynî de hewteyê ravêrte Şaxê Wanî de di dewijanê ke pêsê xo çerênîyene ameyî destbendkerdene û dima ra helîkopterî ra bi îşkenceyî ameyî eştene. Têna eşkerayîya fermîye hetê Walîyê Wanî ra ameye. Walîtîye vat dewijî helîkopterî ra ginayî war û derheqê babete de cipesayîşî dest pêkerd.

Parlamenterê HDPyî yê Wanî Murtat Sarisaçî ke derheqê babete de qisey kerd nê vatî: ''Eşkerayo ke paştî dîyeno îşkenceyî. Seba ke îşkencekarê verênî serbest ameyî veradayene ewro dewijî helîkopterî ra yenê eştene. Wan de îşkence serranê peyênan de zêdîya. Wezîrê Karanê Zereyî huqûqî binpay keno.''