Erdoganî û hukmatê Bexdadî 22yê nîsane de Bexdad de bi peymananê neweyan prosesêk da destpêkerdene. Anqara wazena ke bi nê peymanan şerê vera têgêrayîşê azadîye yê Kurdîstanî de Iraqî bikera şirîkê xo.

Bi rojan o serê ekrananê televîzyonan de weşanê bi babeta leşkerî, ekonomî û dîplomasî ya Anqara nêdîyena la babeta ke 'çin hesibîyena' nêrazîbîyayîşê vera dewleta tirke yê. Hêzê Iraqî têgêrayîş û operasyonanê leşkerîyan ê dewleta tirke ra aciz ê.

Îtîfaqê Fettîhî Al-Fatlawî  pare kerd ke ê nêwazenê ke dewleta tirke erdê înan de operasyonan bikero. 

Koalîsyonê Dewleta Huqûqî yê Iraqî pare kerd ke ê do tewrê şerê 'wekaletî' nêbê. Endamanê Koalîsyonî ra Fedal Mawat Kassar El Zeriwajîyî ANFyî rê qisey kerd û dîyar kerd ke peymanê Erdoganî dûştê menfaetanê Iraqî yê.

Zarijawîyî ard ziwan ke detayê peymanan rayaumûmîye rê nêameyê eşkerakerdene û vat: ''No zî şikan afernenı. Yeno waştene ke planê şerî yê neweyî yê Anqara bêrê caardene. Tirkîya gêrena ke hêzanê Haşdî Şabî û Iraqî tewrê şerî bikera. La ma erdê xo de îşxalê tirkan nêwazenê. Ganî leşkerê tirkî erdê Iraqî ra bêrê vetene.''

Zarijawîyî bale ante ser ke Erdoganî vatêne 'Ma do korîdorê asayîşî bi 30-40 kîlometreyanê zereyê Iraqî rê berê' û vat: ''Ganî Iraq nêverde ke Tirkîya ancî bikewa erdê Iraqî. Bi têgêrayîşê Tirkîya ganî safhayêka newîye abiba. Çunke no îşxal o. Hukmatê Iraqî ganî vera îşxalê Tirkîya têbigêro.''