Sekretera Pêroyî ya Komîsyonê Zîndanî ya Baroyê Amedî Reyhane Goka ke ANFyî rê qisey kerd vat vera tepişteyan xirabîya sîstematîkî yena kerdene

Reyhane Gok bale ante rewaş xirabe ya zîndanan ser û nê vatî: ''Heqê tepişteyan hetê îdareyê zîndanî ra yenê binpaykerdene û dozgerîye û dadgerîyê înfazî nê binpaykerdişan girdêr kenê. Heqê xebergirewtişî destê tepişteyan ra yeno girewtene, şertê xirabî yê werdî, kêmîya îmkanê resayîşê hewcadarîyan, seyrkerdişê tepişteyan, îşkence û muameleyo xirab û xeylêk binpaykerdişê heqanê bînan est ê. Tepişteyî raştê îşkence û muameleyê xirabî yê sîstematîkî yenê.

Kantîn de her çî zaf vayo û seba ke merdimê tepişteyan pere şawenê înan rê dewayî yenê akerdene. Kargoyî nêresenê tepişteyan. Şertê werdî û pakîyê zaf xirab ê. Xeylêk reyî tepişteyî pê jehr kewtî. Warê taybetî yê koguşan bi kamerayan yenê seyrkerdene. Bi qeraranê Heyetanê Çimdarî û Îdareyî tepişteyê ke cezaya înan qedîyena zî bi tewirkêkê keyfî nînê veradayene û cezaya bîne yena dayene.''

Reyhane Gok vistvîrî ke rîyê raporanê Dezgehê Tibê Edlîyî ( ATK) ra xeylêk tepişteyî zîndan de merdî û vat: ''Tepişteyê nêweşî nînê tedawîkerdene, mergî rê ameyî caverdene. Berdişê nêweşxaneyî zî îşkence yo. Muayeneyo bi keleçeyî, wextê sewqî de cigêrayîşo rut, erey sewqkerdiş ya zî qet sewqnêkerdiş û ge ge tepişteyê nêweşî hetê personelê weşî ra yena tedawîkerdene. Zafê tepişteyê nêweşê giranî û extîyarî ke ganî bêrê tehlîyekerdene bi raporanê ATKyî yê ke  keyfî yenê hazirkerdene, nînê veradayene. Tepişteyî rîyê îdareyê zîndanî, dozgerîye, dagerîya înfazî, ATK û îqtîdarî ra dinyaya xo bedilnenê.

Xora kesê ke zîndananê tîpê S û Yyî de şertanê muebetê giranî  û tecrîdî de yê heqanê zîndananê bînan ra zî mehrum yenê verdayene. Nê zîndanan de tepişteyî qet şoqê tîje nêvînenî. Nê zîndanî zirar danê weşîya rûh û fîzîkê merdimî. Nê zîndanan de caardişê sîstematîk û organîze, îşkence yo eşkera û muameleyo xirab est o. Huqûqê zereyî û mîyanneteweyî yeno binpaykerdene.''