Zîndananê Tîpê F, T, M û Asayîşê Berzî yê Wanî de binpaykerdişê heqanê tepişteyan zêdîyenê. Xeylêk tepişteyê ke cezaya înan qedîyaya, bi bahaneya 'halê xirabî' vera nêdîyenê. Zîndanan ke tepişteyê sîyasî yê ke 30 serrê xo temam kerdê, ganî zîndanê akerdeyî de bêrê cakerdene yan zî vera bidîyê.

Îdareyê zîndanî naye ra ver tepişteyanê sîyasîyan ra persê 'ti poşman bîyî' perseno. Eke tepişteyî cewabêkê negatîfî bidê vera nêdîyenê û zîndanêkê akerdeyî de ca nêbenê.

Huqûqnas Fevzî Çelîkî derheqê babete de eşkerayîyêke daye û ard ziwan ke rewşa 'poşmanîye' têna wextê muhakemekerdişî de eşkeno bikewo rojdem û îfade kerd ke persê serê poşmanîye seba ke rûmetê tepişteyanê sîyasîyan bişikîyo yeno perskerdene. Fevzî Çelîkî vat: ''Asta caardişê ceza de nêbeno ke no pers bêro persayene.''

Çelîkî da zanayene ke no nêzdîbîyayîş û teda binpaykerdişê qanûnê bingeyî yo.