Qirkerdişê Roboskî ra 8 serrî vîyartî ke 34 dewijê dewa Roboskî ya qezaya Qilabanî ya Şirnexî bi bombardûmanê teyarayanê şerî yê dewlete ameye kiştene. Herinda ke sucdarî bêrê hukmkerdene, keyeyî yew bi yew ameyî hukmkerdene. Têkoşînê Roboskî yê seba edaletî dewam keno.

Heyetêko ke Hemsereka KCDyî Parlamentera HDPyî ya Colemêrgî Leyla Guven, endamanê KCDyî û Mayanê Haştîye yê Amedî ra ameyêne meydan zîyaretê keyeyanê Roboskî kerd û dejê keyeyan pare kerd. Endamanê heyetî ANF reyde qala vînayîşanê xo kerde.

Guvene vat: "Cenazeyê parçe bîyayeyî hetê keyeyan ra cayêk de ameybî pêser. No barbarîyêka pîle bi. Ma ameyî tîya de dejê keyeyan pare bikê. Wexto ke ma dadîyan ra rewşa înan persenê ê zî bale ancenê nêdîyayîşê sucdaranê qirkerdişî ser. Dejê înan têna bi nê hawayî edilîyenê. Tarîxê ma de qirkerdişê sey Roboskî dibare yê. Roboskî û Helebçeyê Başûrî, Til Rifatê Rojawanî, Ceylan Onkol û Ugur Kaymazê Vakurî.. Bi nê hawayî qirkerdişî kewtî ma dima. Her ca de Qirkerdişê Roboskî esto.Ma dadîyan ra rîca kenê ke kincê sîya xo ra nêdê û şîne ra bivejîyê. Seba ke kiştoxan ra hesab bêro persene ma do pîya têkoşîn bikê. Kesê ke dewlete temsîl kenê eşkenê bi hawayêkê asanî venga keyeyan bidê, înan rê gef biwanê. Înan keyeyan rê gef wend û vat ke Roboskî qirkerdiş nîyo. Wazenê ke her kes mesele wina bivîno û kesêk dewlete sucdar nêko. Çunku zanenê ke ê sucdar ê û do bêrê hukmkerdene.

Endama Mayanê Haştîye Razîye Işiktaş vat: "Ma 7-8 keyeyî zîyaret kerdî. Ma dî ke dejê her keyeyêkî ê bînî ra pîlêr o. Dejê înan bi ma zaf giran bi."

Endama heyetê Mevlude Atsiz vat: "Dadîyî her roje bermenê. Ma zî vat ke ma dadîyî dejê şima pare kenê. Ma sey dadîyan têna haştîye wazenê."