Bi wesîleya serrgêra Qirkerdişê Roboskî yo ke 28ê kanûna 2011î de ame viraştene û zadê înan domanî 34  kesî ameyî qetilerdene dewe de  vîrardişêk ame viraştene. Pîya bi keyeyanê şehîdan xeylêk parlamenterê HDPyî, îdarekarê KCD, HDK û DBPyî û Mayê Haştîye tewrê vîrardişî bîyî.

heyeto ke  bi konvoyêkê dergî kewt rayîr xeylêk cayan de hetê polîsan ra gerîya binê ablûqaya. Heyet dewe de hetê wesayîtanê zirxinan ê polîsan ra ame verwazîkerdene. Heyet tîya ra binê ablûqa de de verê xo da Goristanê Roboskî.

Encu: Herinda Qetilkaran de Roboskîyîjî Yenê Hukmkerdene

Goristan de badê rêzgirewtişî duayî ameyî kerdene. Verî parlamenterê HDPyî yê Şirnexî yo verên Ferhat Encuyî qisey kerd. Encuyî vist vîrî ke qirkerdişî 8 serrî xo dima verdayî la hema qetilkarî nêameyî hukmkerdene û vat: ‘‘Herinda qetilkaran de merdimê şehîdan ameyî cazakerdene. Ewro ganî tîya serekê Komeleya Roboskî Velî Encuyî qisey bikerdêne la o zîndan de yo. Wa her kes bizano ke ma vera zextî çok nêdane têkoşînê ma do dewam bikero.‘‘

Koçyîgîte: AKP do Hesabê Qirkerdişî Bido

Hemvervatoxa HDKyî Gulîstan Kiliç Koçyigit zî vat: ‘‘Zaf lawikê kurdan estê la qet yew zî nêrasayî Roboskî. Êyê ke vanê qey no do cayê AKPyî de bimano xeletê. AKP do rew ya zî erey hesabê naye bido.‘‘

Guvene: Ewro Her Ca Roboskî Yo

Hemsereka KCDyî Leyla Guvene zî nê vatî: ‘‘Ewro her ca Roboskî yo. Wa dayîkî bizanê ke no dej têna tîya ney, heme Kurdîstan de esto. Bi serran o vera kurdan qirkerdişî yenê kerdene. Vanê no qitkerdiş ney qeza yo. Nê no qirkerdiş o.  Ma dayîkanê Roboskî ra ozre xo wazenê ke ma zaf dawa dima vaz nêdayî. Ma soz danê dayîkan ma do ewro ra tepîya hîna zaf na dewa ser o vinderê.‘‘

Temellî: Îqtîdar bi Dişmenîya Kurdan Wazeno Payra Bimano

Hemserekê Pêroyî yê HDPyî Sezaî Temellîyî zî vat:‘‘ Seba ke hesabê qirkerdişanê verînan nêame dayene Roboskî bi. Eke ewro hesabê Roboskî mero persayanene qirkerdişê neweyî benê. Îqtîdar bi dişmenîya kurdan wazeno payra bimano. Qetilkarî wa hol bizanêke hesabê nê qirkerdişî do bêro persayene. No deynê milê ma yo.‘‘